Aizawlah Schedule Tribe Girls’ Hostel hawng

Nimin khan Ministry of Tribal Affairs bultuma sak Govt KVM HS, Chhinga Veng-a Scheduled Tribe Girls’ Hostel chu Finance Minister Pu Lalsawta’n a hawng.

ST Girls’ Hostel hawnna inkhawm SWD Director Dr.Lalnunthara kaihhruaiah hian Finance Minister chuan, state sorkarin sum a harsat laia sorkar laipui ruahmanna ṭha tak Social Welfare Department kaltlanga chhungkaw harsa zawk leh awmna tur nei lo hmeichhe zirlaite tan hostel sak a ni thei chu a lawmawm hle a, a Bial chhung ngeia hostel changtlung tak an nei ta chu a vanneihthlak hle a ni, a ti.

He hostel hi zirlaite bakah vengchhung mipuite tan pawha chhawrnahawm tak a nih a beisei thu sawiin Minister chuan, a vawn fai leh hosteller hmeichhe zirlaite himna thlengin sikul hotute bakah veng chhung mipuite mawhphurhna a ni tel a ni, a ti.

Social Welfare Minister Pu PC Lalthanliana pawhin thu sawiin, Ministry of Tribal Affairs chuan Social Welfare Department hnuaiah ST Girls’ Hostel 13 sakna senso a tum vek a, hostel 10 sak zawhfel tawh a ni a, nimina hostel hawn tak hi a 9-na a ni a, hostel 3 dangte chu sak zawh thuai a ni ang, a ti a. Heng bakah hian Social Welfare Dept leh Northeast Consultancy Services (NECS) ṭangdunin project engemawzat an thawk mek a; Mizoramah hmun 4 – Ngopa, Tuipang, Chawngte leh Lawngtlai – ah Residential School sak mek a nih thu leh Girls Hostel thar sak nan Cheng Nuai 40 pawh pek an nih thu a sawi.

Nimina Hostel hawn tak hi Cheng Nuai 337.54 senga sak zawh a ni a. Hostel hi building pahnih, chhawng 3 ve ve a ni a. Hostel room-te bakah study hall, recreational hall gallery, kitchen, dining hall leh toilet block 7 a awm a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram