Higher & Technical Education Minister Pu R. Romawia chuam kumina Mizoram quota-a technical course hrang hrang zir tur thlanna neih mekah Mizoram sawrkar chuan Category-I chu ram neitu Zofate kutah chauh a dah dawn, a ti.
Nimin khan hemi chung-chang hi thuchhuah hmanga sawiin Minister Pu R.Romawia chuan kum 2014-a Mizoram sawrkar leh MZP inbiakna angin Mizoram quota-a Technical courses zir tur thlannaah ram leilung fa dik tak ten Mizoram quota an luah ngei theih nan Mizoram sawrkar chuan The Mizoram (Selection for Higher Technical Courses) Rules 1999 chu kum 2015 khan a siamṭha a, chu dan siamṭhat chu ram leilung fate him zawk nan ennawn lehin, nikum April ni 20 khan tihdanglam a nih thu tihchhuah a ni a, kum 1999-a Dan siamin, Category-I a ‘Indigenous’ a tih chu ‘Zo-ethnic people of the state of Mizoram’ tia thlak a ni a. Category-II hnuaiah ‘children of non-Zo ethnic people of the state of Mizo-ram’ tih dah tel a ni bawk, a ti a.
Amaherawhchu he dan siam thar hi mi ṭhenkhatin an khin avangin High Court-in hman theih rih loh turin a dang a, hetianga High Court-in dan thar hman a phal tak loh avanga Dan hlui hman ngai pawh nise, kumin 2017-a Mizoram quota-a technical courses zir tur thlanna neih mekah hian Mizoram sawrkar chuan category-I hi ram neitu Zofate kutah chauh a dah dawn a ni, Minister chuan a ti.
Kum dang anglo taka sawr-kar laipuiin All India Level-a Entrance exam – National Eligibility cum Entrance Test (NEET) a buatsaih tak avangin, Mizoram chhunga ṭhalai leh zirlaite chu Quota-ah chauh innghat lova, general aṭanga tling thei tur khawpa taima lehzuala zirna ngai pawimawh turin Minister chuan zirlaite chahin, hun lo kal lehzel turah Mizoram quota hnawh khahna turin sawrkar chuan ram leilung fate himna a ngai pawimawh ber zel dawn a ni, a ti.
Hetihlai hian Chakma Autonomous District Council huam chhunga Chakma pawl hrang hrang niminpiaha Chawngtea ṭhukhawm chuan NEET kaltlanga Medical Course zir thei tura thlan chhuah zinga Chakma zirlaite’n an zirna tur College an zawm vat theih nana hma la turin Mizoram sawrkar an phut tih an sawi a, ram leilung fa nih leh nih loh leh Technical Course zir chung-changin inzawmna a neih an hriat loh thu an sawi rualin, tuna an chênna chu tunhma aṭanga an lo luah tawh a nih thu Mizoram mipuiin hriatpui se an duh thu te, Mizorama hnam hnuaihnung zawkte’n Dan hnuaia chanvo an neih te hum-halhsak tura Mizoram sawrkar an phut thu te an sawi a ni.
Mizoram Peoples Conference Party (MPC) chuan Chak-ma te thuchhuah hi nimin khan chhanglêtin thuchhuah an siam a, Chakma NGO hrang hrang ṭhukhawm ten Mizoram chu hmasang aṭanga Chakma te ram, an lo chen tawh ṭhinnaa an puang ve ngawt chu paidaih har an tih thu sawiin, Mizorama Chakma te chu “Ramdang mi, a rûk a lo lut” an ni a, India a indan aṭanga kum 20 zet hnuah pawh Chakma-te hi ramdang mi an nih tlat avangin Mizorama Mizo hnam hrang hrangte zinga tel ve ngai lo leh chanvo engmah nei ngai lo an ni, an ti a. Ram neitu an nih miau loh avangin Mizoram (Lushai Hills) awptu Superintendent Standing Order No. 16 of 1928-ah Chakma te hi Foreigner an nih zia chiang takin a hriat theih a, tun hnuah chuan Chakma te hian Mizo-ram hi an ram leh khawsak hlunna anga puang ve tawh lo turin MPC party chuan thu-chhuahah chuan an chah a ni.