District pathum hnenah ODF Certificate hlan an ni

Khawlaia inthiar awmlohna, Open Defecation Free (ODF) Certificate chu nimin khan Aizawl District, Champhai District leh Kolasib District te hnenah PHE Minister Pu Zodintluanga’n a hlan.

PHE Department-in an hnathawh thlirletna leh hmachhawp sawihona hun ni 2 awh tur nimina Aizawl I&PR Auditorium-a neih a hmanpuinaah ODF Certificate hi Minister hian a hlan a, Minister chuan thusawiin, World Bank-in a tarlan danin India rama natna inkaichhawn theih zaa 21 chu tui thianghlimlo leh faina kawnga hnufual vang a ni a, tui thianghlim leh faina chu thil inzawm tlat, hriselna atana pawimawh tak anih avangin PHE Department chuan mipuite hmasawnna atan hna pawimawh tak an thawk a ni, a ti a. India ramah mi zaa 70 dawn laiin tui thianghlim in tur an neih loh laiin Mizoramah chuan National Rural Drinking Water Programme (NRDWP), Central Scheme leh State sawrkar sum hmangin khawpui leh thingtlang khaw hrang hrangah tui thianghlim pek hna PHE Department chuan a thawk mek a. AMRUT Scheme hnuaiah Aizawl khawpui chhunga pipe hlui thlak hna thawh mek a ni a, SIPMIU-in mipui hnena tui pek hna tihchangtlunna tur Asian Development Bank loan hmangin an thawk mek a ni, a ti bawk.

Minister chuan mipui tana hnathawk an ni tih hre reng chunga theihtawp chhuaha department dang nen te pawh ṭangruala ṭha taka thawhho zel tur a ni, a ti a, khawvel ṭhang zelin a tlansan nilova mipuite rawng ṭha taka bawl thei turin nitin mahni inzir chhova thiamna (technology) tharte hmang ṭangkai zel turin PHE Department hotute chu a chah bawk a ni.

He hun hmanpuitu dang, Parliamentary Secretary Pu Hmingdailova Khiangte pawhin thu sawiin, PHE Department-in Swachh Bharat Mission chak taka a kalpui mek chu a lawmawm, a ti a, Sawrkar laipuiin ruahmanna a siam angin 2019-ah chuan Mizoram pumpui chu pawna inthiar awm lohnaa puan theih a nih ngei a rin thu a sawi a, Tui semtu leh meter reader aṭanga a lal ber thlengin rinawm taka hnathawh a pawimawh thu leh Department hmel tilangtu leh tihmingṭhatu an nih theih thu sawiin, theihtawp chhuaha an zavaia Mizoram mipui tana thawk zel turin a fuih a ni.

PHE Review meeting-ah hian chawhnu lamah technical session neiin hnathawh dan thlirletna leh hmachhawp sawi-ho nan hun an hmang a, vawiin-ah nilengin technical session leh sawihona hun Aijal Club-ah chhunzawm leh a ni ang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram