Forest Training Institute-ah Ngiau lian sample dah

Nimin khan Environment, Forests & Climate Change department hnuaia Forest Training Institute, Bethlehem Vengthlang, Aizawl ah India rama Ngiau thing (Michelia champaca) lian ber cross-cut sample dah chu Pu Rosiama Vanchhong, PCCF (Wildlife) chuan a duh apiang en theih turin a hawng. He thing hi India rama Ngiau thinglian ber anih mai bakah, khawvel pumah pawh a aia lian record hi hriat a ni lo.

Pu Rosiama Vanchhong, PCCF (Wildlife) chuan he thinglian sample hi zirlai, researchers leh training nei tura ramchhung leh pawn atanga lokal te tan a chenfakawm a beisei thu a sawi a. N. Khawlek YMA Branch te inpekna a ropui a tih thu leh tarlang bawk. Pu Liandawla, APCCF pawhin thusawiin zirmite chuan Annual Ring Count hmanga thing upat zawng chhutchhuah mai bak ah, annual ring pattern atang hian kum tamtak chhunga thil thleng ramkang te, khawthal nasa (ruahtui tlem) te leh thildangte pawh an chhut chhuak thin a ti a, he thinglian sample pawh hi chutiang zirbingna atan a tangkai theih thu a sawi bawk.

He Ngiau thinglian hi N. Khawlek ram a mi niin, N. Khawlek YMA Branch in uluk taka an humhalh thin a ni a. Kum 2007 fur laiin thlipui leh leimin avangin a tlu a. He thing a tluk atanga kum 9 zet hnuah EF&CC department leh N.Khawlek Branch YMA te hma laknain a sample hi zaithlak a ni a, Aizawl ah phurh thlak a ni ta a ni.

EF&CC deparment chuan he Ngiau thing lian hi ngun taka Annual Ring Count hmanga zirchian a nih hnuah kum 283 zet a upa niin an chhut a ni. He programme hi Pi Margaret Lalramchhani, Principal, FTI in a kaihruai a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram