Inkalpawhna chhia leh siamṭhat hna thawh dan sawiho

Nimin khan Chief Minister Conference Hall-ah I&PR Minister Pu Lal Thanzara kaihhruaiin Public Works Department (PWD) hotute leh thuthar lakhawmtu ṭhenkhat ten kumin fur tui tam avanga Mizoram hmun hrang hranga inkalpawhna a tihchhiat dan leh siamṭhat hna thawh dante sawihovin an ṭhukhawm.

Minister Pu Lal Thanzara chuan ruahtui tlâk hma leh tam em avanga kawng ping leh chhia tam tak awm siamṭha tura PWD hmalaknate chu mipui ngaihven zawng a nih thu leh, chiang zawka inhrilhhriat ṭha a tih thu a sawi a, PWD-in theih-tawp chhuaha an hmalakna chu fakawm a tih thu sawiin, chumi rual chuan kawng pawimawh tak tak PWD enkawlna hnuai a tello an awm thu leh, chungte pawh chu thawm ṭhat a nih theih nan Chief Minister hnena thlen a tum thu a sawi a ni.

Meeting-ah hian PWD hotute chuan an department-in tun hnaia leimin leh kawng chhia Mizoram hmun hrang hranga awm te an thenfai a an thawm ṭhat dan chipchiar takin an sawi a, an hnathawhna kawngah mipui leh department dang te ṭawiawmna leh thawhhona ṭhat avanga chak taka hna an thawh phah thu an tarlang a ni.

June ni 30 thleng khan kawngpui hmun 960 ah leimin leh leitawlh a awm a, kawng chhuat tla hmun 75 ah awmin, retaining wall chhia hmun 81 ah a awm bakah culvert chhia hmun 89-ah a awm a ni. Mipui harsatna sukiang turin mimal khawl hmanga motor kal tlang theih hram nan hma lak nghal zel a nih thu te, ruahsur avanga leimin thenfai tawh hnu tla belh zel te chawpchilh a thianfai thei tura mimal khawl (private JCB, etc.) dah a vên a nih thu te leh, Department-in sum awmsa a neihloh avangin hmun ṭhenkhatah duh angin hma an lak theihloh thu te tarlan a ni.

Heng kawng chhia siam hna bakah hian department hna pangngai kal mek thlen chin te tarlan a ni bawk a, tun dinhmunah Champhai kawng chu Seling leh Kiefang inkarah 15km resurfacing hna thawh zawh tawh a ni a, Kawlkulh leh Khawzawl inkar kawng chu fur in a nanchin vangin hna thawh hleihtheih a la nilo a, a khuar lai hnawh hna thawh mek a ni. Keifang-Kawlkulh kawng leh Khawzawl-Champhai kawng siamna tur chu periodic renewal of project buaipui mek hrih a ni. Tuna Kaladan leh hmun ṭhenkhat danga kawng siam hna thawh mekah compensation dil tam lutuk avanga hnathawh tihṭhuanawp a nih thu tarlan a ni a. PMGSY hnuaiah PWD in khua 253 thlunzawm tur a target zingah khaw 169 chu lirthei a inkalphawh theihin siam a ni tawh a, Bawngkawn aṭanga Durtlang panna kawng chu BRO kawng a nih avangin siamṭha tura an hotute nena inbiak a ṭul thu tarlan a ni bawk.

Kawng siam leh enkawlna senso hautak thu meeting-ah hian tarlan ni bawkin, PMGSY kawng (single lane) atan kilometre khat zelah formation cutting leh side drain siam nan cheng nuai 94, black-topping na atan kilometre khat zelah cheng nuai 74, kawng thuam ṭhat nan cheng nuai 16 (per km) leh strengthening atan cheng nuai 42 (per km) hman a nih ṭhin thu sawi a ni a.

Mizoramah hian National Highway 1465.12 km a thui leh 170 km a thui state highway bakah major district road 601.4 km a thui leh kawng chi hrang hrang dang 3891.261 km a thui a awm a. State PWD enkawl kawng zawng zawng thui zawng hi 6127.789 km niin, BRO kawng chu 896.315 km a thui a ni a, CPWD kawng 175.6 km a thui leh Department dang dang enkawl 432.9 km a thui Mizoramah hian a awm bawk.

Leave a Reply Cancel reply

This site uses Akismet to reduce spam. Learn how your comment data is processed.