Kali Kumar Tongchangya-a’n fiahna paltlang zo lo

Chakma Autonomous District Council (CADC)-a Congress sawrkar, Chief Executive Member (CEM) Kali Kumar Tongchangya-a kaihhruai chu fiahna paltlang zo lovin, nimin khan paihthlak a ni.

Hun engemawti chhung CADC sawrkar a buai hnuah Governor thupekin nimin khan CADC sawrkar hi ding zui zel thei a nih leh nih loh ‘Special Session’ koin bûk a ni a, Session-ah hian mipui thlan member 20 leh ‘ruat seat’ luahtu mem-ber 4-te an tel kim thei a. Amit Kumar Chakma-a’n sawrkar rintawklohna ‘no confidence motion’ a pu lût a, Vote lâknaah vote nei thei member 20 zinga 15-in sawrkar rintawk lohna motion hi an thlâwp a, MNF MDC H.Amaresh Chakma erawh chu vote lâk lai hian house chhung-ah awm duh loin a chhuak a ni.

Hetianga sawrkar dinglai a tlâk tak avang hian Chakma Autonomous District Council (Constitution, Conduct of Business, etc.) Rules, 2002-a inziak angin CADC-a member ngah ber Congress Legislature Party chuan an hruaitu tur thlangin, ani hian Governor hnenah sawrkar a siam theih thu a thlen ang a, Governor-in Chief Executive Member atan lo ruatin a thurawn angin Executive Member 7 a ruat bawk ang.

Tarlan tawh angin CADC sorkar a buai avang hian kar hmasa Thawhlehni khan Governor chuan CADC sorkar thuneihna zawng zawng a kutah lain, chawlhkar khat chhunga sorkar a chak tawk leh chak tawk loh finfiah turin CADC Chairman a hriattir a. Governor-in a aiawha hma la tura a ruat Lawngtlai DC chuan Governor duhdan hi tihlawhtlingin nimin khan CADC sorkar fiahna atan Special Session hi koh a ni ta a ni.

Hetihlai hian MNF District Hqrs. Kamalanagar huaihawtin MNF Party mite chu nimin khan CADC Assembly House kawtah pungkhawmin CADC sorkar a la chak tawk leh chak tawk loh fiah a ni ringawt chu an duhkhawp loh thu an sawi a, Special Session nei tura kohna lehkha an hal. MNF District Hqrs. Kamalanagar President Rasik Mohan Chakma chuan CADC sawrkara eirukna chhui turin ‘floor test’ neih ringawt chu a tawk lo a, Inquiry Commission dina chhui chian ngei an phut thu Governor hnenah an thlen thu a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram