Zothlifim Logo
Loading ...

Sports minister Pu Zodintluanga chuan sawrkarin ram fai leh changkang zawka an tih danin khawlaia bawlhhlawh paihte pawisa chawitir theihna dan a ngaihtuah mek a ni, a ti.

He thu hi nimina Swachh Bharat Abhiyan bawhzuina chi khat atan Sports & Youth Services Department-in faina hnatlang a huaihawt pual inkhawm Aizawl Sipai lam-muala neihah Pu Zodintluanga hian a sawi a, Sports Minister chuan India rama state fai berah Mizoram chu siam tuma hma lak mek a nih thu leh Aizawl chu India ram khawpui hrang hrang zinga fai ber a nih theih tur thu a sawi a, chumi atan chuan a ram chhunga chengten faina leh thianghlimna an ngaih pawimawh a ṭul a ni a ti.

Nimin zinga Faina Hna-tlangah hian SYS Department hnuaia wing hrang hrangte leh Affiliated Sports Association-te, NCC, NSS, Bharat Scouts & Guides, Adventure Club, Sports Authority of India leh Mizoram State Sports Council (MSSC) aṭangin mi 1700 chuang an thawk chhuak a, Lammual, Rajiv Gandhi Stadium Mualpui, Sabji Bazar, Ramhlun Sports Complex leh SAI Centre, Mission Veng-thlang te an tifai a, Scouts & Guides ten Chanmari aṭang leh Sikulpuikawn aṭangin kawng-pui dunga bawlhhlawh te chhar khawmin Siai Lammual-ah an intawkkhawm a ni.

Doordarshan Kendra, Aizawl leh Association for Environmental Preservation (ASEP) Gen. Hqrs. Aizawl ṭang-dun pawhin nimin khan Bawng-kawn leh Durtlang inkarah faina hnatlang an nei bawk.