MNF ṭhalai chuan tunhnaia MBBS zir tura Mizoram leilung fate quota-a hnamdang dah tumna awm chu pawi an ti tih an sawi.
MNF ṭhalaiten thuchhuah an siamah chuan Mizo Zirlai Pawl (MZP) huaihawta July ni 20, 2017-a Higher & Education Technical Wing office, Chaltlang bula Mizo zirlaite’n duh lohna an lantirnaa zirlai tam takin hliam an tuar chu pawi an ti tih sawiin, nasa taka zirlaite kutthlaktu leh thupetute chu an dem tih an sawi a, zirlai hliam tuar zawng zawngte chu Mizoram sawrkarin an inenkawl nan zangnadawmna an phu tawk pe ṭheuh turin an phut a, hetianga insawisakna hi thleng tawh lo se an duh tih an sawi bawk.
MNF ṭhalai chuan hmanraw keng zawk leh invenna nei ṭha zawk police-te’n hmanrua nei lo zirlai naupang zawk, an thiam loh ni miah lova ram leh hnam chhan nana thawk chhuakte hmeichhia pawh thliar lova nasa taka kut an thlak te, zirlai hlau tlanchhe tawh chung pawha police-in an ûmzui hram hram te, police-in an kuttum ngeia zirlai an hnek te, zirlai an rêk lai thla te an hmuhin MNF ṭhalai chu an rilru a na tih sawiin, hleihluak taka zirlaite kut thlak chu hriatthiam har an tih thu leh Police te thu petu thuneitute an dem takzet tih an sawi bawk.
MSU-in 2016 kumtira PwD Commissioner atana B.Sairengpuii rawih nawn a nih duh lohna an lantirnaah pawh khan Mizoram police-te khan Mizo zirlaite chu a nawm a maka kut thlakin thisen an lo chhuah tawh a, hemi hi inchhirna nei lo ang maia police-te’n nasa taka zirlaite kut an thlak leh ta mai chu democracy rama thleng âwm lo tak a nia an hriat thu sawiin, police te pawh mumal zawka zirtirna inpe ṭha leh turin an beisei tih an sawi bawk.
Heng zirlai tam takte hi MBBS zir tum an ni lo nachungin, Zofate chanvo chhuhsak a nih loh nana huaisen taka thawk chhuakte an ni a, ram leh hnam humhalh nana thawk chhuakte chu MNF ṭhalai chuan an zahin an ngaisang takzet tih an sawi a ni.