Zothlifim Logo
Loading ...

Nimin, India leh MNF inremna ziah ni champha vawi 31-na kha sawrkar huaihawtin  programme duan a ni lova, hetihlai hian inremna ziaktu zinga mi MNF party erawhin hmun hrang hrangah he ni pual hian hun an hmang a, an party hruaitute pawh insem darhin Mizoram hmun hrang hrangah Remna Ni hi an hmang a ni.

MNF President Zoramthanga chuan MNF Tuirial East Block-in Lungdai-a Remna Ni an hmanna a hmanpui a, Pu Zoramthanga chuan Constitution leh Dan pangngaite chu Parliament-in a duh ang angin a tidanglam thei a. Inremna thuthlung anga siam dante erawh chu tihdanglam a ni dawn a nih chuan remna siam chu a khawih danglam vek dawn tihna a ni a. Mizoram inremna thuthlung angin India Constitution-ah Mizoram chu State a nihna ang tur leh venhim bik a nihna tur sign hnan a ni a. Chu thuthlung chu bawhchhiain India sawrkar hian thil ti ta sela, MNF pawhin an tih tur leh tih loh tura an tiamte an sut leh vek thiang tihna a ni a, chutiang khawpa rinawm lo leh rintlak loh sorkar nih chu India ram tan tihchi a ni lo, a ti.

MNF Party Hqrs. Office Aizawla Mizo Hnam Run-ah Vice President Pu R.Tlanghming-thanga hovin Remna Ni hi hman a ni a, Pu R.Tlanghming-thanga chuan MNF President Pu Laldenga’n India rorelna sangber Parliament dan siam pawhin Mizoram rorelna Legislative Assembly remtihna tel loa ro a rel theih miah lohna tur Mizo mipuite leh Mizo Hnam humhimna dan, India constitution-a a dah lut thei kha a ropui em em a, hetiang mi bik Mizote Pathianin a pe hi a lawmawm a, Mizo Hnam pa nih a tling em em a ni, a ti.

Remna Ni hi MNF Sub Hqrs huaihawtin Mizo Hnam Run, Lungleiah pawh hman a ni a, he hun hmanpuitu MNF Sr Vice President Pu Tawnluia chuan, MNF leh India sorkar-in remna thuthlung an siam chu Mizo mipui zawng zawng ta a ni a, Political Party ṭhenkhatten nuihza siam nana an hmang ṭhin chu sim se a duh thu a sawi.

MNF Vice President Dr. R. Lalthangliana hovin Serchhip MNF West Block huaihawtin Thenzawlah pawh Remna Ni hman a ni a. Dr. R. Lalthang-liana chuan Remna chu Mizo mipui ṭawngṭaina rah chhuah, Mizo mipui thawh chhuah, Pathian pek a ni tih leh Hnam dang danna (ILP) te, Ownership and Transfer of Land te, Mizo hnam dan leh sakhaw inhung bikna te, Special Category State nihnate chu remna rah chhuah a ni tih hre reng turin mipui a sawm a ni.

India sawrkar leh MNF ten Inremna thuthlung an ziah champha vawi 31-naah hian, Mizoram chhung leh pawna Zo hnahthlak zawng zawng te MPC Party leh ZNP President te chuan Remna Chibai an buk tih an sawi bawk.