NGO Coordination Committee-in Police te chet dan uchuak an ti

MZP-in BD Chakma Minister aṭanga bâng turin an phût

SERCHHIP: Mizorama tlawm-ngai pawl leh zirlai pawl te intelkhawmna, NGO Coordination Committee nimina Central YMA Office-a thukhawm chuan tunhnaia zirlai pung-khawmte chunga Mizoram Police te chet dan chu uchuak an tih thu an sawi a, hetihrual hian MZP Executive Committee nimin Aizawla ṭhukhawm chuan Fisheries Minister Dr BD Chakma chu zirlaiten Police kut an tawrh chungchanga a mawhphurtuah puhin minister a nihna aṭanga bâng tura an phût thu an sawi bawk.

NGO Coordination Committee chuan tunhnaia zirlaite leh police te inepna thleng chu hnam thila punkhawmna nia sawiin, Mizo zirlaite chunga Mzioram Police-te chêt dan chu uchuak an tih thu an sawi a, thisen chhuak hiala zirlai naupangte kut thlâk an ni chu pawi an tih thu sawiin, tun hnuah thleng tawh lo se an duh thu an sawi a, Aizawl Police Station Officer in Charge-in NGO Co-Ordination Committee-a tel MZP hruaitu a ṭawngkhum dan pawh an hriatthiam loh thu sawiin, tun hnuah fimkhur tawh se an duh thu an sawi bawk.

Heng bakah hian NGO Coordination Committee chuan kum 2018 MLA inthlanpui lo awm turah, Chakma Candidate an awm loh nana hma la turin Political Party te an ngen bawk a, hemi chungchang leh Citizen Amendment Bill 2016 chungchangah party tin aiawhte kawm thuai nise an ti a, tun hnaia Mizoram Quota-a MBBS leh BDS zir tur Mizoram Sawrkar-in a thlan chungchangah, Chakma ten ram leilungfate chanvo ang chan an tum chu ṭha a tih loh thu te, Chakma-te chu ram leilungfaah engtik lai maha an pawm theih loh thu te an sawi bawk.

Nimin veka MZP Executive meeting an Pisapui-a neihah Mizo quota-a MBBS leh BDS zirtur thlan chungchanga an hmalakna thlirletin hmalak zel dan tur an rel a, Hemi hnu hian thuchhuah siamin MZP chuan tun ṭum thil thlengah hian Chakma zirlaite hi Chakma Minister Dr. BD Chakma hian lo mikhualin a buaipui a, Chakma zirlaite hi Mizoram sawrkarin motor pein a hruai thlap bawk a, Dr BD Chakma ṭhahnemngaihna avangin Mizo zirlaite hmachhawn turin police tam tham tak tirh an ni, an ti a.

Mizo hnam him nana kalkhawm Mizo zirlaite’n Chakma Minister vanga kut an tuar chu na an tih thu sawiin, MZP chuan Minister Dr. BD Chakma chu Minister a nihna aṭanga bâng turin an phût a, Mizoram Political Party hrang hrangte pawh nakum MLA inthlan lo awm turah Chakma candidate siam loa Candidate atan Mizo ngei hmang ṭheuh turin an ngen a ni.

MZP chuan Mizoram quota-a MBBS leh BDS zir tur thlan chungchangah hnam tana theihtawp chhuahtu zirlaite chungah lawmthu an sawi a, sawrkar nena an inremna angin Mizo zirlai bikte tan a rang thei ang bera counselling neih ṭhat leh a nih theih nan thuneituten hma la thuai se tha an tih thu an thuchhuahah chuan an tarlang tel bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram