Nimin chawhma dar 11 khan Agriculture Conference Hall Serchhipah Serchhip District-a Oil Palm chingtute inhmuhkhawmna hun ‘Oil Palm Growers Meet 2017’ hman a ni a, Pu J.Lalzamliana, MAS, Director of Agriculture (CH) chuan khuallian niin a hmanpui.
Khuallian Pu J.Lalzamliana chuan kan ramah Oil Palm a ṭha duh tih kan insawihmuh a, mi tam takin Oil Palm an ching a, a rah pawh kan seng ṭan mek a, chutih rual chuan Oil palm hi a chingtuten Sekibuhchhuak a ni lova, theihtawp chhuaha thawha a hlâwkna seng chauh tur a ni tih hi hria se a duh tih a sawi a, loneitute hnenah ṭanpuina sum tam tak sem chhuah a ni tawh a, a taka thawh chhuah leh a rah seng tum rilru pu lem lova ṭanpuina sum ringawt buaipui an awm ṭhin chu thil pawi tak a ni, hetiang rilru put hi loneituten kalsan a ṭul hle a ni a ti bawk.
Loneitute hnenah hian Cultivation Cost hlan nghal in Hectare khat zela Rs.4,000/- zela semin loneitute kalkhawmte hnena a hlan zawng zawng hi cheng nuai 10.1547 a ni.
He hunah hian Serchhip District-a Oil Palm chingtute enkawltu 3F Oil Palm Agrotech Pvt. Ltd. aiawhin Pu Lalremngheta pawhin thu sawina hun a hmanga. Kum 10 vel liam ta aṭang khan Serchhip District-ah Oil Palm ṭiak sem chhuah ṭan niin, tun thlenga sem chhuah tawh zat chu 3,77,057 a nih thu a sawi a, kum 2016 aṭang khan loneitute Oil Palm thar chhuah pawh an lei sak ṭhin thu a sawi bawk.
He hun hi Pu James Lalsiamliana, MAS, District Agriculture Officer, Serchhip chuan a kaihruaia, District chhung hmun hrang hranga Oil Palm chingtu mi 132 kal khawmin, Oil Palm enkawl dante leh a hralhna chungchanga hma lak dan turte sawi hona hun hman a ni bawk a ni.