Nimin khan Ministry of Human Resource Development, RUSA hmalakna peng khat, “Curriculum Design Innovative” – College leh University a zirlai kalphung tunlai mamawh mila tha zawka siam chungchang zirhona “Workshop on Curricular Design Initiative under the aegis of Rashtriya Uchhatar Shiksha Abhiyan (RUSA)” buatsaih chu Pu R. Romawia, Higher & Technical Education Minister leh State Higher Education Council, Chairman ni bawk chuan a hawng a. He Workshop hi Aijal Club, Conference Hall-ah neih a ni.
Workshop hawnna inkhawm, Higher & Technical Education Commissioner & Secretary Pu Benjamina kaihruaiah hian Minister Pu R.Romawia chuan thu sawiin, State sawrkar-in sum indaihlohna avangin College hrang hrangte tihchangtlunna kawngah duh angin hma a lak thei loh laiin RUSA hmanga Central sawrkar-in State Higher Education tihhmasawnna atana ruahmanna ṭha tak a kalpui chu lawmmawm a tih thu a sawi a. Hetiang Workshop pawimawhtak Aizawlah ngei buatsaih a ni chuan zirna sang zawkah hmasawnna tha a thlen ngei leh, workshop chhimtuten an hlawkpui a beisei thu a sawi bawk.
He hunah hian Dr. Kumar B. Venkatesh, Professor & Director, Tata Institute of Social Science (TISS) chuan RUSA hnuaiah India ram pum puiah Mizoram chu hma la ṭha langsar ber zinga mi (Top performer) a nih thu a sawi a. RUSA hnuaia Curriculum Reforms hma lak mekah hian State 10 thlanchhuah hmasak zingah Mizoram chu RUSA hmalaknaa a tihṭhat avangin telh a nih thu leh, tunah hian state 6-ah hetiang hma lakna hi kalpui tawh niin Mizoram chu a 7-na a nih thu a sawi.
Hawnna inkhawm zawhah hian Technical Session neih zui nghal a ni a. Dr. Kumar B. Venkatesh, Professor & Director, TISS Mumbai leh University of Pennsylvania, USA atanga lokal mi 4 leh TISS aṭanga mi pahnih te kaihhruaina hnuaiah workshop hi neih a ni. RUSA hnuaia Curriculum Reforms Workshop hi Mizoram-ah chuan a bul ṭanna atan Education Subject/Department tan bika buatsaih hmasak a ni a. Workshop Technical -ah hian Group hrang hranga inthenin, B. Ed leh M.Ed Syllabus hman mek leh College Under Graduate level Education Syllabus-ah te tunlai mamawh mila her rem leh siam that ngai leh belh ngai nia hriatte zirhoa sawiho a ni.
Workshop-ah hian Mizoram chhunga Higher Education Institution hrang hrang – Mizoram University Education Department, Aizawl khawpui chhung Govt. Colleges hrang hrang-a Education Department, Institute of Advanced Study in Education (IASE) leh ICFAI atangin zirtirtu engemawzat an tel a. Higher & Technical Education Department leh State Project Directorate (RUSA) officials-te pawhin workshop hi an hman pui bawk a ni.