Nimin zing dar 6:30 aṭang khan Sangha dil neitu leh mamawhte tan Government Fish Seed Farm,Thenzawl atangin sangha chi engemaw zat hralh chhuah a ni a, he hun hi Pu Thlamuana,MCS, Secretary, Fisheries Department chuan a hmanpui a, Farm hmunhma leh hmalaknate leh hnathawhte a enpui nghal bawk.
Government Fish Seed Farm, Thenzawl hi 7.87 Ha. a zau niin Sangha dil Stocking Pond – 2, Rearing Pond – 7 leh Nursery Pond – 8 a awm a. Ni 11 September, 2008 atang khan ZOFISHFED in enkawlin ni 23 July, 2014 atangin Fisheries Department hian an enkawl chhunzawm ve leh ta a ni. Department-in an enkawl hnu 2015-2016 chhung khan Sangha chi 4,21,000 an thar chhuah bakah 2016-2017 chhung hian Sangha chi 3,35,000 thar chhuak tawhin heng an sangha chi hralhna te hi sawrkar Revenue ah an chhung lut thin a ni.
Heng bakah hian Fisheries Department in Thenzawl a Vantawng Group YMA te enkawl tura Community Fish Pond an siam sakah Pu Thlamuana, Secreatary Fisheries Department chuan Sangha chi a chhuah a ni.
He hunah hian Pi Zonun-tluangi, DFDO Serchhip District chuan Vantawng Group YMA ten Community Fish Pond an enkawl tur chu Thenzawl khua pawhin nasa leh zuala Sangha khawi kawngah ṭan an lak leh zual theihna tur a nih a beisei thu a sawi a ni.
Community Fish Pond hi NFDB (National Fisheries Development Board) aṭanga sum hmuh hmanga siam niin, a siam hna hi Department in a khawih a, Vantawng Group YMA ten an enkawl dawn a, he huna Sangha chi chhuahte hi Government Fish Seed Farm, Thenzawl aṭanga an thar chhuah a ni a, Sangha dil aṭanga an thar chhuah hlawk-na te pawh hi Vantawng Group YMA in an tel dawn a ni.