Tun thla, July chhunga Mizoram sawrkar aiawhte leh HPC (D) aiawhte inbe leh tura ruahman chu August thla lama sawn hlat a nih rin a ni.
Home department hotute sawi danin inbiakna chhun-zawm lehna tur atana inbuat-saihna kal mekah sawrkar lamin tihtur an neihte an peihfel chiang hman lova, hemi avang hian tun thla chhunga inbiakna neih tura ruahman chu sawn hlat a ṭul ta a. August thla chhung ngeia inbiakna neih hman tum a ni a, tun hi official level-a inbiakna hnuhnung ber a nih tawh rin a ni a, a dawt leh aṭang chuan he inbiakna hi political level-a hlan kai a nih theih tawh beisei a ni.
Inbiakna-ah hian thil thui tak an sawi tawh nia thudawn a ni a, Sinlung Hill Development Council thuneihna sang zawk pekte, member zat te, member thlan dan turte leh thil dang tam takah inremna a awm tawh a. Inbiakna hi boruak ṭha tak hnuaia neih ṭhin a nih thu inbiate hnen aṭanga thudawn chuan a sawi.