Serchhip-a VLA te tan ni 3 awh tur training buatsaih

Nimin aṭang khan State Institute of Rural Development & Panchayati Raj (SIRD&PR) te bultumin Serchhip District chhunga MGNREGS hnuaia Village Level Administrative Assistant (VLA) te tan DRDA Conference Hall, Serchhip ah ni 3 awh tur training ṭan a ni.

He Training hawnna inkhawm, Pu Khawlsiam-thanga Khawlhring, Course Director SIRD kaihhruaiah hian Pu V.L Remliana Project Director DRDA, Serchhip chuan hawnna thusawiin, kan thawh hlawhte hlim taka kan lak theih nan kan hnate theihtawpa kan thawh reng a ṭul a ni, a ti a. VLA te chu MGNREGS hna enkawl thei tura sawrkarin tling a ngaih te an nih ang ngeiin tlin taka an hnate thawk tura ngenin, tlin taka an hna an thawh theih nan training ṭha neih hi a pawimawh em em a ni, a ti a. SIRD hotuten Serchhip District VLA te tana training an rawn buatsaih thei chu lawmawm a tih thu sawiin VLA ten ṭangkai taka hmang ngei turin a fuih a ni.

He Trainingah hian MNREGS hnathawh zel dan tur Ministry of Rural Development in ruahmanna a siam thar hrang hrang te zirho tur a ni a, hemi hmanga Department dangte hmalakna tawiawm dan leh tawh ho dan awm thei te pawh Department dang hotute nen sawi ho a ni bawk ang.

He trainingah hian SIRD leh DRDA lama mithiam hrang hrangten zirtirna an pe ang a, Department dang enkawltu officer te nen inkawmhona (interaction) te pawh an nei nghal bawk ang.