Serchhipah Zoram Exodus Movement bul ṭan a ni

Zoram Exodus Movement (ZEM) Steering Committee member pathum, Rev. Dr.K.Thanzauva, Pu K.Sapdanga leh Pu B.Lalchhanzova te chuan Ningani khan Serchhip lokalin tlai dar 3 ah Serchhip Khawtetlang a Tourist Lodge ah Serchhip tualchhung Media lama thawktute, Thalai leh Prominent Citizen mi 34 vel zet te nen inkawmhona hun an hmanga, hma la chhunzawmtu tur Convener an inruat nghal.

Serchhip Tourist Lodge a inkawmhona hun hi Pu K.Sapdanga’n a kaihruai a, ram vei hi sim theih nise Khawvela a thil chak ber te zinga mi a nih thu sawiin mithenkhat ten inthlan dawn apianga vung chhuah thin Perhpawng anga an tehkhin hial thu te, a chhungte pawhin an support loh thu te, chutihrual chuan a tu leh fa te chen ve tho na tur ram siamtha tura beih chu a mawhphurhna nia a hriat thu te a sawi a, mitha leh fel tak tak, ram siamthat tuma Political Party luhchilh ta ten vawiin thlenga Politics tuinu an tihfim theih bik si loh avangin Political Party a lut lova ram siamtha tura beih mai an thlan zawk thu a sawi bawk.

He huna thusawitu Rev. Dr.K.Thanzauva chuan tunhma, Civilization hmasa lamah chuan hmasawnna (Development) hi luipui kam based te’n a ni thin a, chumi hnu ah Political based in hmasawnna hi a kal leh a, tun hunah chuan Knowledge based a hma-sawnna hi a kal tawh avangin zirna lamah te tan kan lak a ngai nasa em em a. Tun dinhmunah chuan kan rama sorkar zirna In zawng zawng kan sawp chhe zo tawh a, kan ram hmasawnna tur thawk tura chherna Pum(School) ber heti taka sawpchhiat a nih mekna ata hi kan kalchhuah (Exodus) a tul tawh a ni. Chutiang bawkin kan Politics khelhdan bawlhhlawh tak lak ata te, Corruption, Economic kalpuidan fuh lo, Administration fello etc ata te hi kan kalchhuah a, keimahni leh thangthar lo la awm zel turte tana “Developed Mizoram” kan siam a ngai a, chumi tur chuan Zoram Exodus Movement (ZEM) hmangin Zoram tluchhe mek hi tungdin leh tura sorkar thar siam kan tum mek a ni a ti a, “Developed Mizoram” siamna a fatu turin Zoram mipui zawng zawng, Neutral te, Political Party a lo awm tawh leh awm mek te, Zoram siamthat duhtu apiang te kan sawm che u a ni a ti.

Zoram Exodus Movement (ZEM) Steering Committee member Pu B.Lalchhanzova pawhin thu sawiin Zoram mipui ten chhuan tur, Pride min pe thei kan nei lo chu a bik takin hnamdang zingah a rualawh-thlak thin thu a sawi a, hnam dang te chuan Economics lama an intodelh te, ram hruaitu an neih that te, an ram development etc te chhuan tur tam tak an neih laiin Mizo te chuan chutiang chhuan tur pakhatmah kan nei ve lo hi a rualawhthlak a, hei hian kan Moral nasa takin a tichhia a, tun dinhmunah phei chuan mipui te pawh hian sorkar tha – Good Governance te pawh kan neih theih an ring tawh lo hial a ni a ti a, mahse heti chung pawha huaisen taka ram vei a penchhuak te vang hian Pathianin kan ram hi engtikah emaw chuan a tidam leh ngei ang tih ka beisei tlat a ni tin Zoram hi mi siamthat tura dah mai lova a siamthatute zinga tel tum theuh turin kalkhawm te chu a sawm.

Hemi hnu hian kalkhawm te atangin sawihona hun tha tak te, zawhna leh chhanna hun te hman a niin kalkhawm ten hlawkthlak an ti hle.

Leave a Reply

This site uses Akismet to reduce spam. Learn how your comment data is processed.