Zothlifim Logo
Loading ...

Sub-Hqrs. YMA Serchhip chuan Inrinni khan Executive Committee ṭhut-khawm neiin an huam chhungah Education Campaign neih nise an ti a, luidung nungcha humhalh kawng ah nasa zawka hmalak zui zel nise an ti bawk.

Inrinnia Sub-Hqrs. YMA Executive Committee ṭhut-khawm hi Sub-Hqrs. YMA President, R. Sanghming-thanga chuan kaihruaiin nikum a YMA Rorel Inkhawmin ‘Mizote Central Service ah tam zawk kan luh theih nan hmalak ni rawh se’ tia lo rel tawh leh hemi bawhzuina atana kumin April 18-a Serchhip Sub-Hqrs. YMA in Education Campaign hawnna, District Bawrhsap hova an lo neih tawh bawhzui dan tur relin, Serchhip-a District Education Officer (DEO) Office nen ṭangkawpin hmalak zui nise an ti a. Education Campaign hi Sub-Hqrs. YMA huamchhunga High School leh Higher Secondary School hrang hrangah a theih anga tam neih tura ruahman niin a hun leh ṭul dangte chu Sub-Hqrs. YMA hruaitute leh Education & Youth Affairs Committee hruaitu ten lo ruahman se an ti.

Hei bakah hian SEC ṭhukhawm hian Branch YMA ten luidung humhalhna kawnga hma an lak dan pawh sawihoin luidung humhalh kawnga hma la Branch hrang hrang te pawhin chak leh nasa zawka hmalak nise an ti a, Central YMA leh Fisheries Department ṭangkawp chuan tunhnai khan luidung humhalhna kawnga hma la YMA Branch te chu luidung humhalh a Signboard tarna tur leh ṭul danga hman turin `3,000/- ṭheuh an hlan nghe nghe a ni.

Inrinnia SEC ṭhukhawm hian Serchhip District Football Association-in Sub-Hqrs. YMA nen ṭangkawpa Inter-Branch YMA Football Tournament buatsaih an rawtna pawh thlirin, Sub-Hqrs. YMA OB leh Sports & Recreation Committee ten a ṭul anga hma lo la zuiin Executive Committee ah la thlir leh nise an ti a, tun thla ni 18-a Khawlailung Branch YMA in an Branch chu Branch pathum-a an ṭhenna hun hmanpui tura an sawmnaah pawh hruaitute telin Keiṭum Branch YMA in Platinum Jubilee an lawmna turah an sawmna pawh a theih anga tih hlawhtlin nise an ti bawk.

Inrinnia SEC ṭhutkhawm ah hian tunhnaia Sub-Hqrs. YMA hnuaia Committee peng te hmalakna hrang hrang pawh ngaihthlak a ni a, Aizawl aṭanga Serchhip panna, NH. 54 Chhingchhip a Lei tlahniam avanga harsatna thleng sut-kianna tura hmalakna te leh Serchhip khawpui chhunga NH-54 tlahniam avanga harsatna thleng sutkianna atana hma an lakna te pawh tarlan a ni bawk.