Ruihhlo leh thil dang vanga nun kawng dik zawh hlei theilote enkawlna hmun Aizawl Chawnpui Venga ṭawngṭai Bethel Camping Centre-ah tunhnaia rawlthar kum tlinglo a thih avanga lungawi lo mi ṭhenkhat te chu nimin khan ṭawngtai Bethel Camping Centre kawtah an pungkhawm a, buaina leh pawikhawihna engmah a thleng lo.
He Camp-a thi rawlthar chenna Govt. Complex Veng mi ṭhenkhat lungawilohna lantirtute hian an veng aṭangin ṭawngṭai Bethel Camping Centre thleng hian kawng an zawh a, Centre inrelbawlna fel lo siamṭhat an phut thu tarlanna thuziak te an keng a, Centre kawtah thu an sawi bawk.
Social Media lamah ṭawngtai Bethel Camping Centre sawi chhiatna a rik rin tak em avang hian nimin khan he Camp-a awm mi 160-te chu an chhungte’n an la chhuak a, heng mite hian zawhna chhangin, mutna mumal lo, ei leh in leh inthiarna mumal awm lo bakah tui thianghlim duhkhawp hman tur awm lo te chu an harsatna tawh lian zual te a nih thu an sawi a, nimina a hmuna kal ve Central YMA Vice President Pu Vanlalruata chuan nun kawng diklo zawh mekte siam ṭha tura an beihna kawngah helai Camp bak hi indahluhna tur hmun dang an neih loh thu sawiin, tuna he Camp-a la awm mekte enkawl dan tur pawh ngaihtuah thiam har tak a ni, a ti.
Tunhnaia ṭawngṭai Bethel Camping Centre sawiselna a rik nasat tak avang hian niminpiah khan Aizawl-a chanchinbumi ṭhenkhatte chuan he Camping centre hi a hmunah an lo tlawh tawh a, a enkawltute leh an enkawl te pawh an kawm a ni.
(Pic: Alfred Vanchhawng)