Zotrek Youth Adventure Club te chuan nimin khan Aizawl Press clubah Thuthar lakhawmtute kawmin, Mizoram hmun hrang hranga Tuikhawhthla an lo teh tawh te san zawng dik tak an puangzar a, Mizorama tuikhawhthla sang bera ngaih Vantawngkhawhthla chu Metres 229 ni lovin, Metres 99 chauha sang a nih thu an sawi.
Zotrek Youth Adventure Club te hian Mizoram tuikhawh thla an lo teh tawh zingah Mizorama tuikhawthla sang ber a ngaih Vantawng khawh thla san zawng, tun hma a an lo chhinchhiah dan chu metre 229 anih laiin, tun hnai a Zotrek Youth Adventure Club ten Vantawng khawh thla san zawng an teh ṭhat leha a landan chuan metre 99 chauha sang a ni tih an hmu chhuak tih an sawi. Zotrek Youth Adventure Club te hian Vantawng khawh thla san zawng hi Hruizen, Measuring Tape leh Khawl (Altimetre) hmang a tehin, tunhmaa Mizo ten Vantawng Khawhthla san zawng kan lo hriat dan leh kan lo pawm thin dan kha a lo dik lo tih an hmuhchhuak tih an sawi.
Zotrek Adventure Club te hian kum 2015 March ni 4 khan Kau Tlabung, Khawhthla Sang an lo teh tawh a. He tuikhawhthla hi Hydel Project Tuikhuah a nih tak hnu ah kumtluana tui khawhthla a nih tak loh thu an sawi a, a khawh thla hi metre 120.1 a sâng a ni an ti. Tunhnaiah Zotlang Youth Adventure Club, Lunglei te nen July ni 6 – 8 chhung khan Joint Expedition nei lehin, Khawiva kham an teh a, a san zawng chu 83 m a nih thu an sawi bawk a ni.
Zotrek Youth Adventure Club te chuan Mizoram chhungah hmun nuam leh tlawh chakawm tak tak te kan neih te sawrkarin a enkawl danah an duh khawp lo hle tih an sawi a, a nihna bo ṭhak khawp leh, ṭhangthar te tan a hlutna bo vek khawp a a hmunhma cheibawl a ni ṭhin chu pawi an tih thu an sawi bawk.