ZEM-in Assembly Record Bu aṭangin sakhaw diriamna thu nawhreh an phût

Zoram Exodus Movement (ZEM) chuan Assembly Record Bu-a sakhaw diriamna thu nawhreh an phût thu an sawi.

ZEM thuchhuah chuan “Zu sawimawi duh luat vang mai maia Kristian sakhua leh Kohhran diriamna ṭawngkam, March ni 25, 2017-a ram rorelna in zahawm taka sawi chhuah a nih dan kha, Zoram Exodus Movement chuan ṭha lo a ti tak zet a. Minister pawimawh tak thusawi mah nise, ṭhangtharten an rawn hai chhuah fo atan pawh thil ṭha lo, ṭangkaina nei bawk si lo a nih avangin, assembly session rorel record bua chuang chi niin kan hre lo a, nawt reh mai turin Assembly speaker kan ngen a ni,” an ti.

ZEM chuan kum rei tak aṭang khan assembly inthlanah hian mi tam takin vote thlâk an phur tawh lo hle tih an sawi a, mahse khua leh tui ṭha chuan vote a thlak ngei a ṭul bawk si avangin, phur lo chunga vote thlak a ngai ta zel mai niin a lang, an ti a, mipuiten vote thlak an phur loh thin chhan chu sawrkar ṭha din tura rinngam an hmuh loh vang ni bera an hriat thu an sawi a, kum 2018 MLA inthlan hunah erawh chuan, mi zawng zawngten phur tak leh lungsi taka vote an thlak theihna turin, Zoram Exodus Movement chuan Mizoram mipuite tan symbol thar chhawp chhuah a tum ta tih sawiin, Mizoramah sawrkar ṭha ding ve tawh se tih duhtu zawng zawngte chu he Movement-ah hian tel a, mipui lam hawi duh sawrkar tungding ngei turin an sawm a ni.

Mipuiten rorellai an kham ṭhin chhan ro chu an rel rei vang a ni satliah lo a, mipuite hmakhua thlir lek lova party mite uchuak taka induhsak an chin vang mai mai a ni, tiin, Party worker-ten rem lo chung chunga duhsakna an dawn contract hna hralh a, thawk lova sum siamna atan an hmang zel mai ṭhin chu sim tawh turin an ngen a, party worker-te pawh duhsakna an dawn ang ang chu kut tling taka thawk tawh ṭhin turin an phût bawk a, Contract hna hralh hi dan bawhchhiatna a ni a, la ching zuite chu an dan bawhchhiat phu tawka hrem tur leh, hna hralh tih hriat chiante chu contract hna dang pe tawh lo thurin ZEM chuan sawrkar a ngen bawk a ni.