Zothlifim Logo
Loading ...
Independence Day 2017 Champions - New Serchhip FC

Nimin khan Serchhip District Football Association-in Independence Day lawmna atana an buatsaih I Division Football Tournament Final-ah New Serchhip Football Club chuan2-1-a P&E Veng Football Club hnehin New Serchhip FC chu a zâwna I-Day Champion an ni ta.

Nimina final khelhah hian inkhel ṭan tir lamah an innawr tawn zak zak a, mahse an khel rei tulh tulh a, tun dinhmuna SDFA hnuaia Club ṭha ber tihngam New Serchhip FC lamin an nawr ta zawk a, minute 34-naah New Serchhip FC tan R.Lalremruata chuan Penalty aṭangin goal hmasa ber a thun ta nge nge a, New Serchhip player-ten an goal thun an lawm (celebrate) laiin P&E Veng player-ten an thah a, an nawr nghal a, mahse New Serchhip player FC-ten an nangching hman a, an si phurh an sût hman lo a, first half-ah goal dang a lut tawh lo.

Second half-ah pawh game a dang em em lova, New Serchhip FC bawk chu a nawrtu zawk an ni a, chance an hloh an hloh hnu-ah minute 56-naah H.Vanlalremruata chuan New Serchhip tan goal a thun leh ta nge nge a, 2-0-in hma an hruai ta a, hun tawp dawnah P&E Veng tan Vanlalhruaia chuan Box pawn aṭangin mawi takin goal a thun a, P&E Veng an phûr thar a, hetihlai hian New Serchhip defender Ralkapzauva chu Yellow card vawi hnih a hmuh avangin hnawhchhuah a ni zui a, P&E Veng an phûr zual sauh a, mahse kim lova khel New Serchhip lam bawkin an nawr chhunzawm leh ta zawk a, amaherawhchu hun tawp thlengin goal a lut ta lova, champion phu zawk New Serchhip FC chuan 2-1-in hnehna an chang ta a, a zawnin Independence Day Football Tournament Champion an ni ta a ni.

I Division-ah hian Fairplay team chu FC Serchhip Kawnpui niin, Lalhriatzuala New Serchhip FC chu Best Player-a thlan a ni a, goal 6 thuntu Lalrinpuia Hmarveng FC chu Top Scorer a ni.

II Division Screening Tournament-ah Chhim Veng FC champion-in I Division-ah an kai a, hetihlai hian Chhiahtlang FC chu I Division aṭangin II Division-ah an tla thla thung a, tarlan tawh angin II Division-ah hian Bungpui FC, Hriangtlang chu runner-up an ni a, Bungpui FC hi Fair Play team-ah thlan an ni a, an player Lalengliana chu Best player-ah thlan a ni bawk a, goal 8 thuntu Lalsangzuala, Chhimveng FC chu top scorer a ni bawk.

Independence Day 2017 Champions – New Serchhip FC