Minister of State a nihna aṭanga bang ta Dr. BD Chakma chuan Higher & Technical Minister Pu R.Romawia chu Technical Zirlai Counseling pek tur zinga Chakma zirlai te an tel ve avanga buaina chhuakah a mawhphurtu bera a ngaih thu a sawi.
Dr BD Chakma chuan zawhna chhangin, H & TE Minister-in July ni 26-a thuchhuah a siamah ram leilung fa dik tak ten Mizoram Quota an luah ngei theih nana The Mizoram (Selection for Higher technical Courses) Rules 1999 chu siamṭhat niin, kum 2015 khan a siamṭha a, he dan siam thar hi tu emawin a khin avangin High Court-in dan thar hman a phal loh chu Dan hlui pawh nise kuminah chuan Mizoram chuan Category-I chu ram neitu Zofate kutah chauh a dah dawn tih Pu Romawia’n a sawi chu thil pawm theih loh Dan kalh a ni, a ti.
Nimina Mizo Zirlai te Counselling neih tur pawh hriattirna awm lovin nizan hmasaah Radio hmanga puan a ni a, Aizawl pawna awm tan thlen hman a ni lo a ti a, Chakma zirlai Counselling kal tur te pawhin nimin nileng khan koh an nghak tih sawiin, Aizawl SP ah venhimna an dil pawh hnial thlâk an ni a, zirlai te pawh koh an ni lo a ti a, an thil kalpui dan chu ṭha lo hle a ni a ti.
Pu BD Chakma chuan Mizoram chhunga Chakma Foreigner lo luh chungchang-ah, SDO, BDO te leh Official te bakah Election Commission te pawh Mizo vek an ni a, BLO bak Chakma Official pakhat-mah an awm lo tih sawiin, Electoral Roll leh Hearing neihah anmahni ngei kal a, Document ngai te nena endik vek an ni ngei awm si a, engtinnge dan lovin Electoral Roll-ah an chuan theih ang, tiin zawhna a siam a, hei bakah hian hnam bil tana hma la ṭhina puhna chungchanga zawhna chhangin Pu BD Chakma chuan Democracy hnuaiah mi tupawhin a ngaihmawh thil chu a ti thei a, pawi a sawi leh sawi loh erawh a thlirtute ngaihdan a ni tih a sawi a, NGO hrang hrang, Young Chakma Association thlengin mahni hnam thil leh hmasawnna tur chu an auchhuahpui ṭhin a ni a ti.
Pu BD Chakma chuan Mizo te leh Chakma te inkarah inhriatthiamna awm thei se a duh thu a sawi a, innghirhona dah bova ṭha taka inbiakna awm thei se a duh thu a sawi bakah a bânna chungchangah ama duh thu ngeia bang a nih thu sawiin, Congress hotuten bâng tura an nawr loh thu a sawi a, hetiang dinhmun an thlen takah chuan bân a duh leh duh loh thutlukna siam turin an hrilh mai zawk niin a sawi.