Nimin khan General Administration Department buatsaihin Mizorama Cable TV service pe chhuaktu Multi System Operators te leh an hnuaia Local Cable Operators leh Last Mile Operators-ten Cable Television Networks (Regulation) Amendment Bill, 2011 hnuaia Cable TV service pechhuak-tuten analogue signal titawp a, digitized signal chauh pe chhuak tawh tura hma an lak dan chungchang thlirhona co-ordination meeting chu Secretariat conference hall-ah neih a ni.
Meeting hi Pu Vanlalmawia Jt.Secretary GAD-in kaihruaiin sawrkar department pawimawh te leh district hrang hrang aṭangin DC te leh an aiawh te bakah Nodal Officer leh MSO te, MICODA leh Mizoram Consumers Union hruaitute an tel a ni.
Meeting-ah hian District hrang hranga MSO te leh an hnuaia LCO/LMO te aṭangin Digital Addressable Cable TV Systems (DAS) an kalpui tawh chin leh an dinhmun tlangpui te ngaihthlak a ni a, Consumers Union hruaituten Cable TV Service Provider leh Operators te aṭanga beiseina leh ngenna an neih te nen inpawh taka sawihona neih a ni.
Pu Vanlalmawia chuan GAD chu Cable TV digitization chungchanga mawhphurhtu department a nih angin district hrang hranga Nodal officer te chu an area chhunga Cable TV digitization chungchanga hma-lakna tur te hrilhin Cable TV Networks (Regulation) Amend-ment danin a phût te chu vawi lehkhatah zawm kim nghal vek theih ni lo mahse, mumal taka thil kalpui thuai a nih theih nan mawhphurtu zawng zawng te chu ṭan la turin a chah a ni.