Inrinni khan Hnam Chhantu Pawl buatsaihin Mizoram chhunga dân loa awm Chakma chungchangah inrawnkhawmna hun Hnam Chhantu Office, Upper Republic Aizawl-ah neih a ni.
He inrawnkhawmna hun Hnam Chhantu Pawl President Pu R.Ramhmangaiha kaihhruai-ah hian Central YMA President Pu Lalbiakzuala, Pu Lalrozara leh Pu Lalthara IAS (rtd) te thusawi ngaihthlak hnuah zau takin sawihona neih a ni a, hmalak zui zel dan tur ngaihtuahtu tur Committee din a ṭul thu sawiho a ni bawk.
Thusawitute zinga mi Central YMA President Pu Lalbiakzuala chuan vawiina Mizoram dinhmun hian naktuka a awm dan tur a hril dawn a, Politics-a ngaihdan in an lohnate hian hun lo kal zel tura Mizote an dinhmun dal lo se” a ti a, ram leh hnam a him loh chuan tumah an him bik dawn a lo a ni” a ti. Chakma pung chak lutuk chu a ngaimawhawm tak zet nia sawiin political party te chu seat 2 chan huam mai tur leh kohhran te pawh hma la lo ngam mai turin a duh tih a sawi a, Ramri vengtu BSF ten ramdangmi lut an awmlo tia Nil report an pe reng chu mak a tih thu sawiin Chakma pun chak chhan chu anmahni mi leh sa ‘Registrar of Births & Deaths’ an neih vang nia a hriat thu a sawi.
Thusawitu dang Pu Lalrozara chuan vote duh vanga Politician te hnamdang laka an inzuar nasa lutuk chuan ram a tibuai tih a sawi a, ramdangmi lakah thikthu chhiat a ngai tih sawiin, Mizoram Chakma te chu kum 2100 ah chuan nuai 35 an tling tawh dawn niin a sawi bawk.
Pu Lalthara IAS (rtd) pawhin paper present in Mizoram political party te chu an election manifesto-ah Chakma chungchang chiang taka tarlang tura ngen nise, Legislative Assembly ah Chakma Autonomous District Council chu dan diklo a din a nih avangin paih tura resolution siam nise tiin a rawt bawk.
He inrawnkhawmnaah hian Mizoram chhung leh pawn aṭangin mi 100 vel an kalkhawm a, thusawitu te chuan Chakma chungchang bawhzui tur hian fimkhur taka hmalak a ngaih thu leh dân anga kal a ṭul thu an sawi a, Chakma zawng zawng a pawng a taka huat ngawt a dik loh thu leh India khua leh tui dik tak Chakma te pawhin Dan lova Mizoram rawn lut rute chu an ngaimawh ve em em a ni, an ti a, Chakma leh Bru chungchanga hmalak zel dan turah ‘nu phut’ lovin Dan hnuaiah fimkhur taka hmala turin Core Committee emaw din tha an tih thu an sawi a ni.