Zothlifim Logo
Loading ...

India ram pum huapa Chakma zirlai inzawmkhawm, All India Chakma Students’ Union chuan Mizoram Chief Minister Pu Lal Thanhawla chu NEET counselling-a tel tur Chakma zirlaite venhimna pe duh loah an puh.

AICSU chuan National Eligibility cum Entrance Test (NEET) hnuaia medical course zir tura inziak tlingte tan Zirtawpni khan counselling buatsaih nimahse, Chakma zirlai palite chu venhimna pêk an nih loh avangin an inlan thei lo niin an sawi a, counselling-a Chakma zirlaite an tel theih loh chhanah Mizoram Chief Minister chu an puh a ni.

Thuchhuah an siama an tarlan danin Zirtawpni zing lam khan Chakma zirlaite chuan Chief Minister chu hmuin counselling neihna hmun an thlen theihna tura anmahni venghim tur police an dil niin an sawi a, hei hi Chief Minister Pu Lal Thanhawla chuan a hnâwl niin an sawi.

Chief Minister bakah hian Chief Secretary leh Police department hotute hnenah pawh August ni 21 khan an sahimna tur ngaihtuahsak turin Chakma zirlaiten an lo thlen tawh niin AICSU-te chuan an sawi a, hei bakah hian Zirtawpni zing lam khan Aizawl SP pawh Chakma zirlaite counselling-a an inlan ngei theih nan venhimna pe turin an ngen bawk niin All India Chakma Students’ Union-te chuan an sawi.