Medical Course zir tura inziak tling Chakma zirlaiten an zirna an ṭan thuai theihna tura hma la tura Mizoram sawrkar nawr nan nimin khan Chakma-ten Kamalanagar-I-ah kawng an zawh a, hei hi Mizo Zirlai Pawl (MZP)-ten an tihdin avangin Chakma te leh MZP te hi hun rei vaklo an innawr buai a ni.
Chakma Autonomous District Council (CADC) huam chhunga pawl hrang hrang huaihawtin nimin chawhma dar 10 khan Kamalanagar-I khel-mual aṭangin Chakma mipuiten kawng an zawh ṭan a, Kamala-nagar II-a Chawngte SDO (C) pisaa memorandum an thehlût tur chu MZP-ten an lo tihdin avanga hun eng emaw chen an innawr buai hnuah, Chakma mipuite hi memorandum thehlut loin an ṭin darh a ni.
Memorandum thehlût tura Chawngte SDO (C) pana kawng zawhtu Chakma mipuite leh anmahni lo dangtu MZP te innawr buainaah hliam na lutuk tuar an awm hriat a ni lo a, Chawngte MZP hruaitu pakhat erawh lunga an vawm fuh avangin thisen a chhuak niin an sawi.
Chawngte SDPO Pu Albert Lalnunpuia chuan tun dinhmun-ah boruak sosang zualpui a dai rih tawh niin a sawi a, Chawngte-ah hian Mizoram Police, CRP leh 2nd Bn. MAP awmsate tih loh sipai tirh belh an ni lo a, nimina Chakma mipuiten kawng an zawh dawn avang hian Aizawl leh Lunglei aṭangin MZP hruaitu mi 23 vel Chawngteah hian an awm a ni.
Hemi hnu hian MZP Gen. Hqrs. chuan thuchhuah siamin, Chakma NGO-te leh Political Party hrang hrangte hi kawng an zawh hma ngeia an lungawi lohna hi lungawi lohna tur a nih lohzia hrilhfiah tumin Aizawl leh Lunglei aṭangin MZP Vice President Pu B.Van-lalṭana hovin MZP hruaitu mi 23 chu Chawngteah an kal a, nimin zing khan Central Young Chamka Association (YCA) hruaitute nen an inkawm a, Chakma hi Mizoram Quota-a Technical Course zir tur thlan-naah Category-I-a awm tur an nih loh thu, Category-I chu ram leilung fate awmna tur a nih thu te, Mizoramah Chakma an pun nasatzia leh foreign aṭanga an rawn luh nasat avanga Mizote rilru a nat thu te MZP hruaitute chuan Central YCA hi an hrilh a, chuti chung chuan kawng an zawh a, an lungawi lohna hi thil awmze nei lo a ni an ti.
MZP chuan Chakmaten kawng an zawh zawhah Chawng-te SDO(C) kuta memorandum, H&TE Minister hnena thlen tur thehluh an tum a, MZP hruai-tute’n thehlut lo tura an lo ngen laiin leh an thu a inhmuh loh avangin innawr buai a ni ta tih sawiin, “Chakma-in kan ram ngei-ah Mizote min bei ngam a ni tih a takin a lo lang ta a ni,” an ti a, MZP hruaitute hian hliam an tuar a, thisen chhuak hial pawh an awm tih an sawi a, “Chakma vanga tuarna hi a thlâwn dawn lo a, kan hnam tana ding ngam Mizo ṭhalai rual an awm reng tih hriain, a ṭul angin MZP chuan hma lam pana ke pen zel a tum a ni,” an ti bawk.
Chakma te hian diptu leh venthawn tur nei hauh lovin hun rei tak chhung Mizote an bei tawh tih sawiin, an hlauh tura te lahin Chakma laka ram hum tumtute an bei zawk fo a, ram chhantu turte berin Chak-ma hi mikhual ena en lovin fa anga a ngai zawk em ni tih tura thil a kal tlat mai chu MZP chuan pawi a ti tak zet tih an sawi a, Chak-ma-ho an an chungah Mizote rilru a nâ a ni tih leh huaisar taka an chêtnate hi Mizo ṭhalaite’n an dodal ngam a ni tih an hriat phahna a nih beiseiin, MZP chuan Chakma ṭhalai sang rual hmaa ding ngam MZP hruaitute chu a chhuang a ni, an ti a, ram leh hnam chhan turin Mizo mipuite chu ṭangrual zel turin an sawm a ni.