Nimin chawhnu khan Chief Minister Pu Lal Thanhawla chuan a Office-ah NGO hruaitute kawmin thil pawimawh bik a sawipui.
Chief Minister Pu Lal Thanhawla chuan CYMA, MZP, MSU leh NSUI hruaitute chu Mizoram tana MBBS seat pek zât tihhniam chungchang leh Citizenship (Ammendment) Bill 2016 chungchang a sawipui a, sawrkar ngaihdan leh a hmalakna te NGO hruaitute hi a hriattir bakah Mizoram tân leh Mizoram ṭhatna tura NGO hmalaknaah te fimkhur taka thiltih ngai a ni tih a sawi a, an inkawmnaah hian hmalakdan ṭha nia an hriat te sawiho a ni.
MBBS seat kum 2017-18 chhung atan Mizoramin 17 chiah a nei ta chu thil tih dikloh a nih thu leh Mizoramin Doctor a mamawhna a sâng hle zawk a ni tih ziakin Chief Minister chuan Mizoram tana MBBS seat pek ṭhin chu 25 ah tihpun leh nise tiin Union Health Minister Pu Jagat Prakash Nadda hnenah nimin khan lehkha a thawn tih sawrkar thuchhuah chuan a tarlang.
Citizenship (Ammend-ment) Bill 2016 chu sakhuanna tlawhchhana diklo taka khua leh tui nihna mi ṭhenkhat hnenah pekna remchang a ni tih leh hemi chungchangah hian Mizoram sawrkar pawh Joint Committee on Citizenship (Ammendment) Bill 2016-in ṭha a tih anga râwn ve nise, inrâwnnaah hian Mizoram chhunga political party te, NGO hruaitute leh sawmbik te pawh telh ve nise ṭha a tih thu Chief Minister chuan kumin July ni 31 khan Union Law Minister Pu Ravi Shankar Prasad hnenah leh August ni 11 khan Dr. Satyapal Singh, MP, Chairperson, Joint Committee on the Citizenship (Ammendment) Bill 2016 te hnenah te lekha a ziakin a lo hriattir tawh tih sawrkar thuchhuah chuan a sawi bawk.