Bulgarian Grigor Dimitrov chuan Cincinnati Open final-ah Nick Kyrgios chu straight set-a hnehin a vawi khatna atan Masters 1000 title a la a, hmeichhe lamah Wimbledon champion Garbine Muguruza a champion bawk.
Kum 26 mi, World No. 11 Dimitrov hian 6-4, 7-5-in World No. 23 Kyrgios lakah hian hnehna a chang a, kum 22 mi, Kyrgios hi kum 2009-a Novak Djokovic hnua Cincinnati finalist naupang ber niin, unforced error 31 ngawt a nei a, Semi-Final-a World No. 2 Rafael Nadal a hneh ṭuma a chêt ropui dan angin a che ropui thei lo a ni.
Mipa final khelh hmaa hmeichhe final khelhah Muguruza hian World No. 2 Simona Halep chu 6-1, 6-0-a hnehin a champion a, Halep hian hnehna chang se chuan World Ranking-ah Karolina Pliskova luahlanin No. 1 a ni thei dawn a, mahse kum 25 mi, Halep hi minute 57 chhungin Muguruza lakah a tlawm ta si a, No. 1 nih theihna chance ṭha tak a neih chu a hmang ṭangkai thei ta lo a, Semi-Final-a Muguruza hnehlotu Pliskova chu Halep aia point 5-a sangin No. 1 a ni chhunzawm zel ang a, Halep hian dawrin Muruguza chu No. 3-ah a chho dawn a ni.