ZNP Vice President Dr. Kenneth Chawngliana (Ex-Speaker) chuan, Congress sawrkar chu Lokayukta din ngam lo sawrkar a nih thu a sawi.
Nimina ZNP chhung inkhawm party Pisa-a neihah he thu hi sawiin, ZNP Vice President chuan, India Parliament-in a lo pass tawh, ‘Jan Lok Pal and Lok Ayuktas Bill 2013’ chu January ni 14, 2013 khan kum khat ral hma ngeia din vek turin (mandatory) state tin te chu an lo ngen tawh a ni a ti a, India ram state 29 zingah state 22-in Ayukta hi an din tawh a, la din ve lo zingah Mizoram chu a tel a ni a ti.
Mizoram sawrkar pawhin a hming chuan hma an lak ve thu sawiin Dr. Kenneth Chawngliana chuan, November ni 13, 2014 khan Mizoram Legislative Assembly chuan ‘Mizoram Lokayukta Act, 2014’ chu a pass ve a, Rules and Regulations pawh an duan fel vek tawh hnu ah leh, hnathawktu tur staff 35 lakna tur te leh thildang senso lailawk ngai (token provision) atan Cheng Nuai 159.34 dah fel a nih thu Finance Minister-in December 6, 2016-a a puan vek tawh hnuah pawh tun thlengin hmalakna thar hmuh tur a awm chuang lo a ni a ti a, “Mahni puala thuneihna pumhlum nei (Independent body) sorkar hnuaia eirukna chhuitu tur, High Court Chief Justice ho meuh han awm tur hi tuna kan ministry hian a zuam ngang lo a ni” a ti bawk.
ZNP Vice President chuan “Corruption-a fihlim lo sawrkar kan hrawn mek a ni,” tiin, CAG Report-2017 ah NLUP sum hmanna dik lo tam tak tarlan a nih laiin kan CM ber chuan chhuichian a hnekin ‘CAG Report hi kan pawm lo’ a ti hlauh thung a, M/S Mizo Carbon Product Ltd. te, NIAS-a zirlaite behchhana sum tam tak tichingpena inpuhna awm te, Dihmunzawl-a PHE Building ṭhiatna atana uchuak taka Bill siam te chu kan sorkar hian ngawihbopui a tum tlat a ni a ti bawk.