Serchhip Town VC Association-ten Serchhip Damdawi in sak ṭhat tum mekah bialtu MLA, Chief Minister ni bawk Pu Lal Thanhawla lungphum phumna ni lo, tuna damdawi in awmnaa sak tumna a awm nia hriain ṭha an tih loh thu an sawi.
Thudawn danin Serchhip Jt. VC te hi nimin zing khan an Chairman Pu PC Siamliana kaihhruaiin Lalpuithanga Hall, Chhim Vengah an ṭhukhawm a, tuna Serchhip damdawi in awmna chu khawpui chhung lai tak a nih avangin mipui hriselna thilah leh damlo tan thil ṭha lo thleng thei a ni tiin, CM-in sawn chhuah a duhna chu ṭha an tih thu leh sakna tura tih Tarpi tlang chhim lam Lawibualah sak thuai an nghahhlelh thu an pass a ni.
Hetihlai hian Serchhip Damdawi inah Doctor leh thawktu dang ṭha tak leh inpe tak tak an awm mek chu lawmawm an ti a, hetiang doctor ṭha tak tak dahtu Mizoram sawrkar chungah an lawm a, hemi mai bakah indaih lohna avanga hah tak leh chawlh pawh nei hlei thei lova he damdawi ina thawk te chunga an lawmthu resolution siamin an pass bawk.