Zothlifim Logo
Loading ...

Dr. BD Chakma chuan nimin khan Chief Minister Pu Lal Thanhawla hnenah Minister of State aṭanga a bânna a thehlut.

Chief Minister hnena a banna lehkha a thehluhah hian Dr. BD Chakma chuan Mizoram state qouta-a MBBS zir tura Chakma zirlai 4, National Eligibility cum Entrance Test (NEET) 2017-a an inziah tlin thu tarlangin, heng Chakma zirlaite hi Higher & Technical Education Department chuan July ni 20 khan ‘Counselling’ tura koin ‘Counselling’ neih zawh a nih hnu, hemi ni vek hian chhan engmah sawi awm lovin Higher & Technical Education Commissioner-in ‘Counselling’ neih tawh chu ‘Cancel’-in, ‘Counselling’ neih ṭhat leh tur, a ti a, ‘Counselling’ neih leh hun tur hi Department-in tun thlengin a la ruat leh lo, a ti a.

July ni 26-a Higher & Technical Education Minister Pu R.Romawia’n thuchhuah a siamah MBBS quota chu Zohnahthlak te tan chauh hauhsak a ni dawn tih tarlangin, hei hian chiang taka Chakma pali ten MBBS an zir vena tur remti lova, hnawl an ni tih a tichiang a, hei hi Dr. BD Chakma hian pawmlo in, bânna a thehlut ta a ni.

Bânna lehkhaah hian, State mipuiin an aiawh tura an thlan a nih avangin, Minister of State a nihna angin eng hnam, chi leh sakhaw zawm pawh nise, in ang khat leh thlei bik neiloa, an rawngbawl chu a tih tur a ni tih hria-in, hemi avanga mi rilru tam tak tih nat pawh a nei mai thei chu pawi a tih thu a tarlang tel a, hetiang hi thil awmdan a nih avangin Minister a nih zui zel chu a rem lo nia hriain a bânna a thehlut tih Dr. BD Chakma chuan a lehkhaah a ziak a, a bânna chu lo pawmsak turin Chief Minister a ngen a ni.

Thulakna tarlan danin Dr. BD Chakma bânna thehluh chungchangah hian Chief Minister chuan a pawm leh pawm loh tur thu a la sawi lova, Mizoram Larsap hnenah an thlen leh phawt tur thu a sawi a ni.

Dr. BD Chakma hian nimina bânna lehkha a thehluh zawh hian a mimal motor-in Lawngtlai District tlawh turin a kal nghal a ni.