Hun rei tak chhung Hnahlan khuaa grape chingtute pawl hniha awm ṭhin chu pawl khatah an in chhungkhawm.
Society pahnih Hnahlan Grape Grower Society leh Hnahlan Grape Farming & Processing Cooperative Society Ltd., a hruaitu te’n inzawmkhawmna tura hma an lak tawh chu tluang taka kal tlangpui zel a nih hnuah Zirtawpni khan Society pahnihte chuan Inremna Thuthlung (MoU) point 6 chu lungrual taka pawmin inremna saui an tan a ni.
Society pahnih inzawmkhawm hming atan hian ‘Hnahlan Grape Grower & Processing Society’ tih a ni ang a, Society thar hming hi Official-a sawrkara a in-register hma chu a ṭul dan a zirin Society pahnih Registration a khawi emaw zawk zawk hmangin Company, sawrkar te an dawr ṭhin dawn niin an sawi a, chairman atan C.Vanlalhriata ruat a ni.
Hnahlan khuaa grape chingtute hian an thlai thar hralhnaah harsatna nasa tak an tawk mek ni a sawi a ni a, MLPC Act hman a nih hnu hian an wine siam chhuah Zawlaidi chu a hralhna a awm tawh lo tluk a ni a, hetihlai hian Ministry of Agriculture and Farmers Welfare chuan an sum hloh cheng vaibelchhe 3 vel Market Intervention Scheme (MIS) hmangin a rulhsak dawn a, tun aṭanga rei loteah grape chingtute hnen a thlen beisei a ni, an ti.
Grape Chingtute hian National Cooperative Development Corporation (NCDC) nen ṭangrualin winery changkang leh lian zawk din tuma hmalak ṭan mek a ni a, Wine quality ṭha tak siam chhuak a, hmun danga wine siam chhuah te el pha tura ruahmanna siam a ni a. Grape variety ṭha zawk hlawhtling taka ching puitling thei turin Indian Agricultural Research Institute (IARI) nen thawhhona neih tum mek a ni bawk.