Nimin khan Serchhip District Football Association-in a buatsaih, Independence Day Football Tournament 2017 First Division League Match chu khelh zawh a ni ta a, New Serchhip FC leh P&E Veng FC-ten Independence Day-ah Final an khel dawn a ni.
Nimina Match hmasa berah Final lut chiang tawh New Serchhip chuan an regular First XI te dahṭha-in player naupang zawk te an luhtir a, heti chung hian Vengchung FC lakah 5-1-in hnehna an chang a, hei hian tun season-a New Serchhip FC squad chah ṭhat tawkzia a tilang chiang viau a ni.
Match hnihnaah Final luh inchuhin Hmar Veng FC leh P&E Veng FC te an inkhel a, final lut tura draw chiah mamawh Hmar Veng FC an vanduai a, First half-ah hma takin goal hnih an chhuah a, hei hi Hmar Veng hian an sût thei lova, 2-0-in P&E Veng FC-in hnehna an chang a, inkhelh hmaa final luhna chance nei ṭha zawk Hmar Veng chuan final an thleng zo ta lo zawk a ni.
Match thumnaa inkhel turah point la hmu lo Chhiahtlang FC chu an inlan lo leh a, hei vang hian IOC FC chu 3-0-a chaka puan an ni a, tun hi an inkhelh hun tura Chhiahtlang FC an inlan loh vawi hnihna a nih bakah First Division Club ni si a, an khelh hun tura an inlan loh avang hian DFA lamin an chungah hremna an lek ngei a rinawm a ni.
Match tawp berah FC S.Kawnpui chuan tun ṭuma an vawi hnih chakna ni turin AWC FC chu 2-1-in an hneh ve bawk a, chak mahse FC S.Kawnpui hian first Division ni chhunzawm zel tur chuan Second Division runner-up nen play-off an khelh a ngai dawn a ni.
Vawiin chhun dar 12 hian Second Division-ah Chhim Veng FC leh Bungpui FC Hriangtlang-ten Final an khel dawn a, a chak zawk zawk hi First Division an kai dawn a ni.
