Zoram Nationalist Party (ZNP) President Pu Lalduhoma chuan Mizoram sawrkarin Flagship Policy thar NEDP hnuaia intihsiakna (Micro-Start up Competition) a buatsaiha lawmman dawngtu-ten lawmman an lak dawna an Account-ah Cheng nuai 5 emaw a tlukpui khawl emaw ram emaw neih a ngai leh si chuan sum leh hun tam tak senga intihsiaknaa tel te beidawngin a siam tih a sawi.
He thu hi nimin khan Aizawl-a an party Office-ah sawiin, Pu Lalduhoma chuan NEDP tihhlawhtlin nan EDS (Enterpreneurship Development Scheme) hnuaiah inti-hsiakna, a tiṭha thlan chhuah-ten cheng nuai 5 an dawn theihna tur Micro-Start up Competition buatsaih a ni a, mi 30 chuangin he intihsiakna hi an bei a, Chief Secretary Conference Hall-ah Power Point Presentation an neihtir hnuah lawmman cheng nuai 5 dawng tur mi 15 thlan an ni ta a, lawmman an han lâk dawn chuan an Account-a cheng nuai 5 nei sa nih emaw, a tlukpui khâwl emaw ram emaw neih a ngai an lo ti leh ta si a, sum leh hun tam tak an sên hnuah beidawngin an siam leh ta si a ni, a ti.
He Competition hi nasa taka vawrh darhin, chanchinbu leh TV ah Video Clip-te nen sum tam tak sengin nasa takin an advertise a, Chief Minister hial khuallian-ah te sawm a ni a, nimahsela, Finance Minister-in, “Sawrkar hnain min daih tawh lova, mahse tunah chuan ṭhalai te tan kawng kan hawng ta, Enterpreneurship hi a ngaihna hria, bul ṭanna tur sum nei lote tan a ni,” tia a sawi nen chuan a inpersan daih ta si a ni, a ti.
ZNP President chuan ṭalaite kan tawrhpui rualin beidawng lo turin a chah a, ZNP Policy – “Bana Kaih Policy” (Hand Holding Policy) tluka chhung tinte tana dinchhuah-na tur a awm lo tih sawiin, “YES” (Youth Empowerment Scheme) hnuaiah hmasawnna rang (Rapid Development) a lo thlen theihna turin policy neitute kut tichak turin mipuite a sawm a ni.
Mizoram Goods and Services Tax Bill chu ni 25.5.2017-a Mizoram Legislative Assembly-in a lo passed tawh pawh sawiin, tunhma lama VAT Act 2005 hnuaia hnam dang laka inhumhalhna kan lo neih ṭhinte pawh chhawm nun zel a ni hi lawmawm an ti tih a sawi a, amaherawhchu, Online Registration tih theih a lo ni bawk nen, a taka kalpui a han nih hnu reilote chhungah pawh hnam dang, kum hnih valid ILP nei lote pawh an in-register leh nual tawh nia hriat a lo ni leh ta der mai a, chuti a nih chuan Economic asimillation chak takin a lo thleng dawn a ni, a ti a.
Mizoram GST Act chu Mizorama hman atana siam a nih ang ngeiin, khauh taka kengkawh turin sawrkar an ngen a, hemi kawngah hian theihtawpa sawrkar puih pawh kan inhuam a ni. Central sawrkar aṭangin emaw, Court lam aṭangin a ni emaw, kan do zawh loh thilten min rawn nang ta a nih erawh chuan tumah indemna turah kan ngai lo va. A engamah hmaa sorkar a inthlahdah sa ringawt a nih erawh chuan Dan neih hian awmzia a nei dawn lo va. Chuvangin, huaisen taka kal phawt mai turin sawrkar an phût a ni
Pu Lalduhoma chuan kum tam tak chhung kan hruaituten ram hlui ziain min lo hruai ta a, “khelh dik” ni lovin “khelh fuh” Policy nen, lalna tur a nih chuan eng hmanrua pawh hmang hreh lova min hruaina rah kan seng mek a, chu chu tunlaia Chakma issue-ah te hian a lang chiang em em a ni, a ti a, Policy-a rinawm ni lovin, Party-a rinawm min zirtir ṭhin avangin party ruihchilhnaah mipui a hnuklut a, a pawi takzet a ni, a ti a, Kohhranhoten Politics siamṭhat tuma an beihna chu a tihlawhtlingtu nih tum turin a sawm a ni.