Liverpool-in Arsenal an sawp; Chelsea an chak

Pathianni zan Premier League-ah Liverpool chuan Anfield-ah Arsenal mikhualin, 4-0-in an mikhual te hi an sawp a, Champion lai Chelsea chuan Stamford Bridge-ah Everton mikhualin 2-1-in hnehna an chang bawk.

Liverpool 4-0 Arsenal
He match-ah hian Arsenal an che chhe hle a, goal thun chu sawi loh, inkhelh chhungin shots on target an nei lo hrim hrim a, October ni 5, 2014-a Chelsea an hmachhawn ṭum khan goal zawna shots an nei lova, khami hnu Premier league game-a shots on target an neih loh leh hmasak ber game ni nghe nghe.

Goal hmasa ber hi minute 17-a lût a ni a, mual dinglam sir aṭanga Joe Gomez cross ṭha zet chu Roberto Firmino chuan a tauh goal a, Halftime dawn minute 5 a la awm tihin Sadio Mane chuan goal mawi tak a khung a, mual veilam sirah ball khalhin, box chhung a luhpui hnuah a ke dinglamin a ṭhuai goal a ni.

Second half-ah goal hnih dang a lut leh a, Mohamad Salah chuan halfway line vela Bellerin ball chu chhuhsakin, 70 yards vela thui ball a khalh hnuin cool takin a pet goal a, minute 77-naah bench aṭanga lut Daniel Sturridge chuan Salah cross ṭha zet chu a tauh goal leh a, 4-0-in Liverpool chuan hnehna an chang ta a ni.

He match-ah hian Salah a tal na hle a, man of the match a ni nghe nghe. Inkhel pumpui thlirin Arsenal hian Liverpool an khan lo hle a, Wenger chuan Alexandre Lacazette bench-a ṭhuttirin Danny Welbeck a start tir, chhuak mai tur nia sawi Alexis Sanchez pawh Wenger chuan a start tir, mahse awmzia a nei lo chiang kher mai. Sanchez hian chhuah a duh avangin a khel tha peih lo ni hiala ngaih theiha chhiain a khel a ni.

Liverpool tan Coutinho chu a la inlan lo tluang zel a, Coutinho tello pawhin Liverpool attacking a pui rem rem hle. Liverpool hian an duhdan taka an khel chhuak thei a nih chuan team tha tak an ni chho dawn chiang a ni.

Chelsea 2-0 Everton
Inkhel ṭan aṭangin Chelsea lamin an nawr na nghal a, bul ṭan ṭha zawk leh an khelmuala khel Chelsea hian darkar chanve an inkhelh tlin hma hretin goal an nei a, Alvaro Morata chuan Everton box chhungah a lu hmangin Cesc Fabregas ball a pe zauh a Spanish midfielder hian tisual lovin goal-ah a chantir. Fabregas goal luhna theihna tura ball kal kual dan hi a nalh a, a tawp khartu leh pet goal tura petu an fakawm bawk.

Everton pawhin goal khung an tum tih a hriat a, mahse an goal bawk a na lutuk thei lo va team pahnih player-te an in titlu ve deuh reng bawk.

Minute 40-naah Chelsea bawkin goal an nei leh a, Alvaro Morata chuan Cesar Azpilicueta ball vawrhluh tauh goal-in an goal hnihna a thun a, Second Half-ah pawh mual neitu lam bawkin an nawr hmasa leh a, Chelsea-in ball an chang hnem hret a, Everton tlarhnung tan hna hautak siam lo mahse an khel ṭha zawk.

Point hlawhchhuak zo ta lo Everton hian Stamford Bridge-a an game hnuhnung 23-ah vawikhat mah hnehna an chang lo va, tun ṭum inkhelah pawh hian Chelsea goal zawnah vawikhat mah an pet lo bawk a ni.