MBBS seat 17 leh BDS seat 8 tan Counselling nei

Nimin chawhma khan Central Pool-a MBBS seat 17 leh BDS seat 8 tan Higher & Technical Department Technical Wing, Chaltlangah counselling neih a ni.

Counselling-ah hian NEET result aṭanga top 100 chin koh an ni phawt a, NEET result aṭanga top 100 te hian Central Pool-a MBBS seat 17 leh BDS seat 8 te hi an thlang a ni. MBBS leh BDS zirtur hian Zofate chauh thlan an ni a, Zofate lo chu Higher & Education Minister in a lo sawi tawh angin category-I ah dah an ni lo a, nimin counselling tihnaah hian MBBS seat 17 leh BDS seat 5 allotment pek an ni a, BDS seat 3 erawh chu Thawh-ṭanni lama counselling neih chhunzawm leh tur a ni ang.

He counselling neih tur chungchangah hian Chakma zirlai te an telh leh telh loh enfiah turin Higher & Technical Office kawtah MZP an pungkhawm a amaherawh chu counselling nei tura koh zingah Chakma zirlai an tel loh avangin boruak ṭha lo thleng a awm lo a ni.

Higher & Technical Education Secretary Pu Benjamina chuan nimina Counselling neih hma hian zirlai Counselling Class nei tura zirlai leh nu leh pa te hnenah tunlai thil thlen dan chungchang sawifiahin tun dinhmunah a hmaa Mizoramin Seat 24 aṭanga 27 a hmuh ṭhin chu, August ni 18 khan Ministry of Health & Family Welfare chuan Seat 17-ah a rawn tihhniam tak avanga sawrkar laipui hnenah dil belh tura an kal nghal thu sawiin, ni 16-a Guidelines thar an lo siamah Seat hi population base a siam a nih thu an lo hrilh a ni a ti a, mipui nuai 1 zelah Seat 2 leh a chanve pek tura tih thar a ni a, sawrkar laipui hnenah hian Mizoramah Doctor mamawhna a sân bik thu te, ziak leh chhiar thiam an tam avang te leh Family Planning an hman ṭhat avanga population an tlêm tak avang te bakah State dangte aia hmunhma ṭha a neih lo laia Seat pek tih tlem bik an nih chu ṭha an tih loh thu an thlen a.

Sawrkar laipui lama an hotute hian tun dinhmunah seat sem darh vek a nih tawh thu an lo hrilh tih a sawi a, in-surrender an awm a nih chuan seat pek belh an tiam a, tun thleng pawha Seat Surrender an awm leh awm loh thu zawtin an be pawp reng niin a sawi a, sawrkar lam hian medical lam chu Seat pek belh a harsat tawh thu lo hrilhin, BDS erawh Patna a mi Seat 4 pek belh an nih thu Pu Benjamina hian a sawi a ni.

Pu Benjamina chuan sawrkarin mipui ngaihdan a thlir aṭangin tunah hian Category-I chu Zofate tan bik a dah a ni tawh dawn a, a hmaa Chakma awm ṭhin chu paih an ni tawh tih a sawi bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram