Chief Minister Pu Lal Thanhawla’n hnathawhna hmun himlo laia eizawng mistiri te tan insurance chungchang ngaihtuah mek a ni a ti.
He thu hi nimina Mizoram chhûnga kutthemthiam thil hrang hrang thawka eizawngtute intelkhawmna pawl, Mizoram Mistiri Association (MMA) din champha vawi 10-na Aizawl-a lawmnaah Chief Minister chuan telpuiin a sawi a, mistiri te insurance siamsak pawimawhna sawrkarin a hria a, zirchianna nei mekin Labour, Employment & Industrial Training Department pawh hemi kawngah hian chak taka hma la tura tih an ni tawh a ni a ti.
Mistiri leh kuthnathawktu dangte hamṭhatna turin Mizoram Building & Other Contructions Workers’ Welfare Board pawhin tha thar a thawh mek tih a sawi bawk a, ṭanpuina dawng thei tur chuan taihmak, tihtakna rilru leh tumruhna aṭanga ṭanpui theitute hriat hlawh nih te pawh a pawimawh tel a ni a ti.
Ram hmasawnna turin a chhunga chêng te – hna hrang hrang thawktu te, nihna hrang hrang chelhtu te, sawrkar hnathawk leh kuthnathawktu te chuan mawhphurhna an inpeizawn vek tih Chief Minister chuan a sawi bawk a, Kuttlinglova sum lâkluh duhtute avanga hmasawnna ruhrel – kawngpui, tuikhuah, rel kawng leh thildang siam hna te thawh chhunzawm hleih theih lova awm ṭhin chu a pawi takzet a ni a ti a. Ramin hruaitu ṭha a mamawh rualin hruaitu ṭhaten hna an thawh theihna tura mipui mawhphurhna a sâng ve tho a ni a ti.
Chief Minister chuan, “Tunhma in kan ramah kan thawhtheih thawhna chang kan hriat loh avangin kan sum tham tam tak kan ram a châm bâng thei turte chu state pawn lam miten rut fai vekin an hawn thla ṭawk ṭawk a, tunah erawh, sawrkar hmalakna leh YMA ṭhahnemngaihna zarah te kan ṭhalai ten pawn lam mi thiamthil te thiam ve ṭan tawhin pawnlam mi sum hawn thlak ṭhin tam tak chu an chhuh tawh a, a lawmawm hle a, ṭanlak nasat erawh kan la ngai hle,” a ti
Tun dinhmunah MMA-ah hian member 1700 awm mekin Mizoram dung leh vangah Branch 50 din a ni tawh a ni.