Sawrkar laipui Ministry of Minority Affairs hnuaia Mizoram-in Pre-Matric Scholarship a hmuh theih tur bituk zât aṭanga chhûtin hmun thuma ṭhena hmunkhat bak scholarship diltu an la awm lo.
Mizoram Scholarship Board Secretary Pu JH Zoremthanga chuan sawrkar laipuiin hnam tlem zawk te tana a dah, Pre-Matric Scholarship pawl 1 aṭanga pawl 9 inkar Mizoram zirlai 12,300 tan a dah laiin Mizoram pumah nimin thlengin mi 1564 chauhin scholarship hi an la dil a, dilna hi August thla tawp thleng chauh hawn a nih tawh dawn vangin zirlai nu leh paten an fate tan scholarship hi dil zel se, a dilna hun hawng chhung ngei hian a tam thei ang berin dil se an duh tih a sawi.
Pu JH Zoremthanga chuan nikum lamah Scholarship diltute Adhaar Card No. an phut avang khan Adhaar card neilo zirlai engemaw zât an awm avangin an nu leh pa leh zirtir-tute pawhin an naupang te an buaipui ṭha peih lo niin alang a ti a. Pu JH Zoremthanga chuan tunhnai maia Ministry of Minority Affairs hotute nen meeting an neihnaah Adhaar Card No. neih ngei ngei ngai ṭhin kha an thlahdul tak avangin nu leh pa ten an fate tan he Scholarship hi dil sak vek thei ila a duhawm hle a ni a ti a, Scholarship dilna hi Internet online hmanga tih theih a ni a, mahnia tih theih a nih bakah hmun hrang hranga Common Services Centre aṭangin a tih theih a, a dilna form portalah hian a diltu Bank Account number leh International Finance Corporation (IFC Code) chiang taka dah lan a ngai a ni a ti.
Scholarship chungchang sawiho hian nimin chawhnu khan Mizoram Scholarship Board Secretary, Pu JH Zorem-thanga chuan zirlai pawl 2 –MZP leh MZU hruaitute chu meeting a neihpui a, ṭhahnem ngai taka Scholarship dil turin zirlai te a chah a ni.
Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117