MizoramPradesh BJP chuan tun hnaia Prime Minister-in hmarchhak state hrang hrang Chief Minister-te Guwahati-ah ko khawm a, ruahsur leh tuilian vanga harsatna a sawipui tuma Mizoram Chief Minister a tel hman lo leh state harsatna tawhte hmaichhana thlen tura hun a nei thei lo chu demawm an tih thu an sawi.
Hemi chungchangah hian thuchhuah siamin Mizoram BJP chuan tun thla ni 1-a Prime Minister-in Arunachal Pradesh, Manipur, Assam leh Nagaland Chief Minister te a kawm ṭuma Mizoram Chief Minister a tel ve thei lo chu ram hmangaihtu a nih lohzia a inpuannaa an ngaih thu an sawi a, heti chunga Central sawrkar team-ten Mizoram tuilian tawrhna hmunte a hmun ngeiah an rawn tlawh chuan Pu Modi-a kaihhruai sawrkar chu sawrkar hlauhawm ni lovin, mamawhtute thleng phak sawrkar a nihzia a takin a tilang a, fund an rawn release ang ang pawh, Congress tihchak nan hmang lova, tuilian tuarte ngei hnena sem ngei turin Chief Minister chu an beisei tih an sawi a ni.
Hei bakah hian, Chief Minister-in NLUP chu Prime Minister special package hmanga sem tur a nih tur thu a sawi laiin CAG report-ah erawh chuan Prime Minister special package a nih loh thu leh NLUP hlawhchham thu chiang takin a inziak tin BJP Mizoram Unit chuan an sawi a, NLUP mai bakah state sawrkar thil tih dik loh leh eirukna tam tak CAG report-ah hian tarlan a ni bawk tih sawiin, heng CAG report zawng zawng hi uluk taka department-te nen document awm ang angte enfiah hnu a, a field-ah endik leh vek hnuah CAG report hi uluk taka siam thin a ni, BJP Mizoram chuan an ti a. Hetiang report a lo chhuah tak avang hian mipui laka hmai phih fai nan CAG report hi a dik lo tih Chief Minister-in a tlangaupui leh chu mak an tih thu leh an thil tih dik loh pawm duh lova insawifihlim tum zel chu Pu Lal Thanhawla kaihhruai Congress sorkar hian basan tawh se tia an ngen thu BJP Mizoram Pradesh chuan an sawi a ni.