MNF-in Furpui Campaign nei

MNF Party chuan inrinni zing khan Aizawl veng hrang hrang kawn lunlaiah Furpui Campaign an nei a, Zemabawk, Ramhlun, Chanmari, New Market, Tennis Court, Thakthing, Khatla, Vaivakawn leh Ramrikawn-ah te hian hun hman a ni.

Khatla kawn Bazarah Pu K.Sangṭhuama, MLA chuan kum 2008 aṭanga Congress Party in NLUP a lo tlinpui tawh, Rs.2/- pea cheng nuai khat dawng tura an inzawrhna chu installment in cheng sing hnih/khat te tein an sem leh si a, chhungkaw tana dinchanna khawpin an pe lo a ni a ti a. CAG-in NLUP a hlawhchham a ni an ti a ti a. NLUP dawng zingah dawng ve awm lo neinungsa – khawsa thei tak tak mi 1400-in an dawng tel ve tih an hmuchhuak tih sawi bawkin India ram pum pawisa endiktu CAG report chu thudik tak a ni a, dawt anga sawi phet tum pawh sim ni se a ti.

Zemabawk kawnah Pu Lalruatkima MLA chuan thusawiin, Zoram kalsual tur vengtu tur MPF office hial Congress mi leh sain an kalchilh chu a pawi hle a ni a ti a, Chief Minister-in an party mi ni lo chu eng atan mah a ti lo’ tih a sawi chuan Congress rilru puthmang a tichiang hle a ni a ti.

Pu Lalrinawma MLA pawhin Tennis Court tualah thusawiin, kawngchhia sawrkar-in tihngaihna a hre lo chu mak a tih thu a sawi a, tuna sawrkar kal dan chuan kawngpui ṭhat ngaihna a awm lo va, kalphung thar a ngai a, chumi tur chuan MNF an inbuatsaih mek a ni, a ti.