MNF President Pu Zoramthanga chuan nakum Assembly inthlanpui neih turah tumah thawhpui lovin an mal din dawn tih a sawi.
Nimina an party Hqrs. Office, Mizo Hnam Run-a an party chhung inkhawmah he thu hi sawiin Pu Zoramthanga chuan BJP nena thawkho tur anga miin an sawi ṭhin chu thudik lo a ni, a ti a. Kum 30 chhung deuhthaw party dang thawhpui tur leh lo thawhpuiin an lo buai ngar ngar tawh a, sawrkar an siam pawhin siam loh pawhin engtiklai mahin tihfuh leh kaltluanpui a la awm thei lo a ti a, AMC-ah an mal din a, an chak tih a sawi a, hei vang hian an party High Command-in a lo rel tlûk tawh angin tumah an thawhpui dawn lo a, a malin an ding dawn tih a puang a, Chakma Candidate an neih loh tur thu an puan pawh ‘BJP nen thawhho an tum vang’ a ni lo, a ti bawk.
MNF President chuan National Democratic Alliance (NDA)-a member an nihna chungchang sawiin, NDA-a an tel hian MNF hi a BJP ta tihna a nilo a, Congress duhlo pawl party-ah an tel avangin chuta tel chu an nih thu a sawi.
Yoga chungchang pawh sawiin Pu Zoramthanga chuan sawrkar zirna in leh office-a tihluihnaa Yoga inzirtir chu ṭha an ti lova, MNF a sawrkar chuan tihluihnain tumah a tihtir dawn lo, a ti a. Bawngtalh khap te, tihluihnaa sakhaw dang inzirtirna tih te, Mizorama tihluihnaa Hindutva lakluh luih te leh Mizote sakhaw ni pawimawh bik, Chawlhni leh ni pawimawh dangte tibuai zawnga phai lam atanga ruahmanna awm thin te leh VIP lo kal tih te chu an remti ve dawn lova, a tawp thlengin an do dawn tih a sawi bawk.