Zothlifim Logo
Loading ...

MPCC President Pu Lal Thanhawla chuan Mizoram Peoples Forum-in mimal in luh chhuaha campaign an phal si chu ṭha a tih loh thu a sawi.

 

Nimina Congress Bhavan-a Political Session neihah he thu hi sawiin Pu Lal Thanhawla chuan MPF-a an hotute ten Zorama inthlanna tha tak leh tluang taka a kal theihna atana thawktu ngei ten, corruption do a, inthlanna felfai leh thianghlim nei thei tura Pathian rawna ngaihtuah ti siin, door to door campaign an phal leh si chu tha a ti lo a ti a, door to door campaign chu Inthlanna thila corrupt ber lai nia a rin thu a sawi.

 

Vote leinan pawisa pe ta se tuman an hriatpui thei dawn lo a, chuvangin inthlanna fel leh thianghlim a awm theih nan chuan door to door campaign chu khap a ngai a ni a ti a. Chutiang zawnga inbeihna chu a do zel dawn a ni a ti bawk.

 

Pu Lal Thanhawla chuan sawrkar hmasawnna hnathawh pawh sawiin, beisei dan chuan Oct ni 8 leh ni 15 inkarah Tuirial HEP hawn a ni dawn tih a sawi a, Nakum chhungin Vankal daiah Solar power megawatt 20 pe chhuak thei pawh hawn a nih tur thu a sawi.

 

Mizoram politics boruak chu an lo duhthusam angin a kal chho zel ni a sawiin, MNF SEDP chu Congress NLUP leh hmun dang dang aṭanga a ṭha lai leh an duhthusam lai lakkhawm niin a sawi bawk a, Congress chu an hotuten an tuipui leh an hmachhawp te chu an miten an thlawpin an tuipui thin a ti.

 

Nimin Political Session-ah hian MPCC Webside thar ‘mpccmizoram.org‘ chu MPCC President Pu Lal Than-hawla’n a tlangzarh nghal a. Hemi chungchangah hian thusawiin, Mizoram a political party zingah Party Website nei hmasa ber an ni a ti a. Sawrkar Department hrang hrang te pawhin website an nei ṭhin na-in ṭangkai taka hmang leh enkawl zui an tlem hle a, hemi kawngah hian taimak chhuah leh zual turin Chief Minister a nihna angin a hriattir nghal tih a sawi bawk a ni.