MZU zirlaiten Vice Chancellor nghet pe thuai turin sawrkar laipui hnenah ngenna an thlen

Mizoram University Zirlaite’n sawrkar laipui hnenah Vice Chancellor nghet pe thuai turin an ngen.

Mizoram University Students’ Council chuan Union Minister for Human Resource Development, Prakash Javadekar hnenah Mizoram University-in Vice Chancellor nghet an neih loh chungchang leh a rang thei ang bera Vice Chancellor nghet pe tura ngenna hi nimin khan thirhrui (Fax) hmangin an thlen.

Hemi chungchang hi thuchhuah siama sawiin, Mizoram University-in kum hnih dawn lai Vice Chancellor nghet a neih loh hnuah Vice Chancellor atana lak tur Candidate-te pawhin Interview an neihna thla thum aia tam mah a liam tawh hnua Vice Chancellor nghet dah a la ni lo te, MZUSC leh Teachers’ Association-te’n vawi tam tak Vice Chancellor nghet an neih loh vanga harsatna an tawh thu leh dah thuai tura ngenna an siam chung pawha tun thlenga ngaih pawimawh a hlawh lo chu Mizoram University zirlaite hmusitnaa an ngaih thu an sawi a.

Mizoram University Students’ Council chuan September ni 5 hmaa sawrkar laipuiin Vice Chancellor nghet a pe lo a nih chuan an dilna tihhlawhtlin a nih theih nan Mizoram University a zirna an chhunzawm tawh dawn lova, hnathawk zawng zawng pawh an Office kai tur an dang dawn tih an sawi a ni.

Nimina Union Minister for Human Resource Development hnena an lehkha thehluh copy hi MZU Visitor President of India, Mizoram Governor, Mizoram Chief Minister, Mizoram Member of Parliament-te leh a kaihhnawih officer hrang hrang hnenah hma lakpui tura ngenin an pe tih an sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram