Zothlifim Logo
Loading ...

Nimin khan Serchhip DC Conference Hall-ah Serchhip District chhunga Village Council Member zawng zawngte pualin kum 2022 hmaa India Ram Thar (New India By 2022) ruahmanna chungchang sawihona buatsaih a ni a, Hrangturzo bialtu MLA Pi Van-lalawmpuii Chawngthu chu khuallian niin, Serchhip District Bawrhsap Pi Sangchhin Chinzah chuan a hmanpui bawk.

Khuallian Pi Vanlal-awmpuii chuan ram ṭha zawk, nuam zawk leh hausa zawk din turin mitinin mawhphurhna kan nei a ni, a ti a, India thar din tura hmalakna chi hrang hrang, faina te, retheihna laka fihlim te, hlemhlêtna laka fihlim te, firfiaka chêtna, sakhaw inlâkbingna leh chi inthliarna lam chi ûmbo kawngah kal khawm Village Council member te chu mahni khua ṭheuhva mite zirtirtu, a taka thawktu tur an ni tih inhre tur leh, retheihna ûm bo tura sawrkar aṭanga ṭanpui-na an dawn ang angte a nihna taka hmanga hmasawnpui ngei tum ṭheuh turin a chah a ni.

He hunah hian Pi Sang-chhin Chinzah pawhin thu sawiin, India Thar dinna kawnga ûmbo tur hrang hrang zingah Faina leh retheihna ûmbo lama hmalâkna chu uar zawka hmalâkna tûr a nih thu sawiin, kalkhawmte chuan Bawrhsap kaihhruaina hnuaiah India Thar Thutiam an tiam rual a, an intiamna lehkhaah an hming ziakin thuneitu sâng zawkte hnena thehluh turin lâkkhawm zui nghal a ni.

He inkhawmah hian Pu Vanlalṭanpuia, MCS, BDO E. Lungdar chuan New India Movement (Sankalp Se Siddhi Abhiyan), he movement hi India mipuiten kum 1942 August thlaa Quit India Movement an lo neih tawhna champha kum 75 naah neih ṭan a ni a, Quit India Movement neih a nih aṭanga a kum nganaah chiah India ramin ramdang awpbehna ata zalenna a lo hmu ta ang khan, New India Movement neih ṭan aṭanga a kum ngana (2022)-ah India ram chu Bawlhhlawhna, Retheihna, Hlemhletna, Firfiaka chêtna, Sakhaw insawrbingna leh Chi inthliarna lakah zalen tumin hma a la ve leh ta a ni, a ti.

He zirhona hi Pu VL Remliana, Project Director, DRDA Serchhip chuan a kaihruai a, thusawituten thu an sawi zawhah kalkhawmten sawihona hun hmang zuiin, hmalak dan tur chi hrang hrang an sawiho nghal a, chung zingah chuan, faina lama hmasawn nana in tinin bawlh-hlawh bawm chi hnih, ṭawih thei leh ṭawih theilo dahna neih te, khawtinin Bawlhhlawh sawngbawlna hmun neih te, sum leh pai inremchemna lam inzirtirte, chhungkaw sum enkawl dan inzirtirna buatsaih te leh hmalak dan tur dang tam tak an rel a ni.