Nimin chawhma dar 11 khan AH & Vety Sector Ser-chhip chuan NLUP-NEDP Con-vergence hnuaia a thawhkhat-na atan chhungkaw 54 hnenah ṭanpuina Rs.21,17,620 an sem.
He huna khuallian Pi Sangchhin Chinzah, District Bawrhsap chuan thu sawiin Mizote hian sawrkar aṭangin ṭanpuina chi hrang hrang kan dawng mawlh mawlh a, mahse ṭanpuina kan dawn nasat tawh dan ngaihtuahin hmasawnna erawh kan nei lo hle thung si, a ti a, nimina ṭanpuina dawngtu te chu an tuina zawng tak, eizawnna atana an thlan a nih angin taima tak leh rinawm taka thawk tur leh hlawhtlinna chang ngei tura fuihin, ram ṭha, boruak ṭha kan nei a, kan ramah hian mi taima tan chaw a nghei theih loh a ni, a ti.
Dr. Lalmakthanga, Chief Veterinary Officer chuan NLUP-NEDP hnuaiah chuan ṭanpuina pawisa hi ṭum hnihah pek zawh vek tum a ni a, a ṭum khatna an pek aṭanga thla 1 ral hnuah an hma laknate endik sak vek an ni ang a, pek chhunzawm tlakte chauh pek chhunzawm an ni ang, a ti.
Nimina ṭanpuina an semah hian Bawnglian vulh thlangtu mi 5 hnenah Bawng in sakna atan Rs.20,000/- theuh, Vawk vulh thlangtu mi 34 hnenah Vawk in sakna, bungbel leh vawk chaw hmun siamna atan Rs.36,000 ṭheuh, Ar vulh thlangtu mi 13 hnenah Ar in sakna, Ar note, Ar chaw leh ṭul dang leina atan Rs.52,740/- theuh, Tlangram Bawng vulh thlangtu mi 1 hnenah Bawng 2 leina tur leh a in sakna tur atan Rs.55,000 leh Sial vulh thlangtu mi 1 hnenah Se nufa leina tur leh ṭul dang atana hman tur Rs.53,000 an pe a, nimin tanpuina sum an pek zawng zawng hi Rs. 21,17,620 niin, heng bakah hian NLUP 3rd & 4th Phase a rokhawlhna avanga dawng ve ta lo chhung-kaw 3 te hnenah Rs.76,000 theuh an hlan bawk a ni.
He hun hi Dr. Lalnghinglova, District AH & Vety Officer Serchhip chuan a kaihruai a, Sawrkar flagship programme pawimawh tak NLUP ṭanpuina chu Serchhip District chhunga chhungkaw 1761 hnenah an Department kaltlanga pek chhuah a nih tawh thu leh AH & Vety Sector Serchhip chuan mi 55 te hnenah ṭanpuina pek chhuah an tuma, mi pakhatin a phat tak avangin mi 54 te hnenah hian ṭanpuina pek a nih tak thu a sawi.