Manny Pacquiao promoter chuan ṭum 8 zet world champion lo ni tawh Pacquiao leh Jeff Horn te inhnek ṭhat hun chu ni reilo te hnuah tihchian a ni dawn tih a sawi.
School zirtirtu hlui Horn hian WBO welterweight title an inchuhnaah July thla khan Filipino boxer hi unanimous point hmangin a hneh a, Horn-a’n Pacman a hneh dan hian sawisel a hlawh avangin WBO chuan an point score chu a ennawn a, an ennawnnaah pawh hian Horn tho chu hnehtu a ni.
Pacquiao promoter Bob Arum chuan, “Australia-a awm mek pawl pahnih te hian Inrinni hian Queensland sawrkar thuneitute nen meeting an nei dawn a, meeting hi a ṭha zawnga kal beisei a ni,” tiin a sawi a, rematch hi November-ah neih a ni mai thei tih a sawi bawk.
A hmuna entu mi 51,000 chuang hmaah Australian boxer hian mite beisei loh deuhin Brisbane-a Lang Park Stadium-ah Pacquiao hi a hneh a nih kha. Mahse British world heavyweight champion hlui Lenox Lewis leh LA Lakers shooting guard hlui Kove Bryant te chu Judge te thutlukna sawiseltute zingah an tel a, kha inhnekah khan kum 38 mi, Pacquiao chu chak zawkah an ngai a ni.
An inhnek dawn khan inremnaah Pacquiao te hian rematch neih leh an duh chuan nei leh theih a nih tur thu an ziak tel a ni.