PRISM chuan ‘PRISM MLA Election Manifesto, 2018’ chu nimin chhun khan Mizoram State Guest House, Aizawl-a Cultural Hall-ah an President Pu Vanlalruata’n a tlangzarh.
PRISM Election Manifesto tlangzarhna hun hi sawm bik te pual a hman a ni a, Manifesto tlangzarhtu Pu Vanlalruata chuan thu sawiin, “Thuneitu ten mipui duh dan an bawhzui ṭhat duh loh hi bawhzui a, kan ram siamṭha tura mipui min auh leh nawrna chhân tumin, kan ram tana ṭha tura kan ngaih te, pawl leh mi hrang hrang duh leh ṭha tih te tihlawhtling a, ram hmelma te laka kan ram chhan tura sawrkar siam kan tum a ni,” a ti.
He election manifesto-ah hian Innerline Reserved Forest laklet tum te; eizawnna hna thar 1,50,000 aia tlem lo siam te; District leh Civil Sub-Division ramri siam that te; eiruk hmang man mai baka an eiruk sa chhuh sak te; ration-a buhfai, chini, khawnvartui leh tel sem te; Tar pension thla khata kum 70 – 79 tan Rs.1,000, kum 80 – 89 tan Rs.1,500 leh kum 90 chin chunglam tan Rs.2,000 pek te; In hmun nei lo in hmun pek leh in neilo in sak sak te; Minister leh MLA hlawh leh facility tihtlem; Aizawl leh khawpui zauh leh khawpui chhung kawng zauh te; Paper Mill, Saw Mill leh Plywood Mill din; Power lama kan intodelh nan HEP siam leh ‘Look West Policy’ leh Regulated Market kalpui tum a nih thu te a tel a ni.
Pu Vanlalruata chuan , “He manifesto hi tihhlawhtlin a nih chuan ram zau zawk, hausa, chen nuam, him, ṭhang chak, industrial leh digital state, chenna in leh eizawnna ṭha nei vek chhungkaw chenna ram kan ni dawn a. Kristianna hi a ṭha bik a ni tih lantir a kan Pathian chawimawi tur te; kan chhehvel hnamte aia ropui zawk kan nih lan tir tur te; Zofate inpumkhatna atana kan unaute hipkhawm tur tein; Mizoram-ah hian ram ralmuang, dik leh fel taka ro inrel, hna neilo awm lohna, mi hrisel leh hlim chenna, ram hausa, hnam dang ten tlawh an chak ram din kan tum a ni. He hnam hian tun hun thlenga chawmhlawm ngaia min siamtu te lak atanga talchhuah hi a hun tawh lutuk mai ni lovin, a mamawh tawh takzet a. Mahni kutke a ding turin he hnam hi siam kan tum a ni. PRISM chuan ‘Ram, Hnam, Sakhaw’ himna leh hmasawnna kan ngai pawimawh ber a. Kan rama hydel project siam mek leh siam tum te, leh kan leilung hausaknaa kan chanvo te tihpun kan tum a. Bangladesh atanga Dan kalha rawn pemlutte hi dapchhuaka thawnkir turin hma kan la dawn a. Lo lut ru an awm tawh loh nan hma kan la dawn a ni,” a ti bawk.
He manifesto tlangzarhnaah hian Vice President pahnih Pu Dr.H.Lal-lungmuana leh Pu K. Tlanthanga ten thu an sawi bawk a, he ‘PRISM Election Manifesto, 2018’ hi PRISM website www.myprism.in atangin a duh apiang tan download theih tura dah a ni.