Ramsa leh nungcha kap leh sumdawn nana hman ching te zawn chhuah dan tur rel

Nimin khan Serchhip District Wildlife Crime Control Sub-Unit te chu an Chairman Pu Lalringdika, Serchhip SP hovin a Office Chamber-ah meeting an nei a, District chhunga ramsa leh nungcha ṭhenkhat, dan phal lohva kap leh sumdawn nana hman chingte zawn chhuah beihpui thlak –Species Specific Wildlife Enforcement Operation neih dan tur an rel.

Ministry of Environment, Forests & Climate Change hnuaia din Wildlife Crime Control Bureau, Serchhip Sub Unit hian, ramsa langsar (Iconic species) Sakei, Sai, Samak leh Keite chi ho bakah ramsa langsar lo Saphu, Sahram, Tangkawng, Sahuai lam chi te leh ramsa dang pawh dan lova tihlum leh sumdawn nana hman chingte tihrema, a tul anga an chunga kutthlak (action lak) dan tur leh; hetiang tih ching hauh lo tura District mipuite zirtirna neih dan te an rel a. Sawrkar laipui ruahmanna anga hetiang tih chingte zawnchhuah beihpui (Operation) an neih tur thu sawiin, an hmalak dan turte an rel nghal a ni.

Beihpuithlak hi August thla chhunga neih tur a ni dawn a, hemi chhung hian District chhung hmun hrang hrangah sapel chingte dapchhuah hna te, mipuite hnena zirtirna te, ramsa sumdawn nana hman ching dap chhuah hna te leh hmalak dan tur dang engemawzat an rel a. Heng hnate hi Serchhip Sub Unit hnuaia Enforcement Agencies hrang hrang – State Forest Department, Police Department, Custom Department leh Army leh Border Security Force ten an thawk ho dawn a ni.

Nimina Serchhip District Wildlife Crime Control Sub-Unit meeting ah hian Enforcement Agencies te an tel kim a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram