Premier League Club te chuan nakum aṭanga hman ṭan turin Season bul ṭan hmaa Nipui Transfer window titawp tawh tura ruahmanna awm chungchang an sawiho.
Tuna kalphungah chuan European league tam tak hian August ni 31-ah Transfer window an titawp a, hei hi Premier League season bul ṭan hnu chawlhkar thumna a ni a, hei hi Premier League Club te chuan an duh vak lo a, hemi chungchang hi September thlaa Shareholders meeting-ah sawiho tura ruahman a ni.
Liverpool manager Jurgen Klopp leh Swansea boss Paul Clement te chu he kalphung thar kalpui duhtu te zinga thawm chhuah ringtute an ni a, FIFA lam chuan Transfer window hi September ni 1-ah chuan khâr ngei tur a ni a ti a, weekend nen a insu buai a nih chuan a hnaivaiah pawh khâr a ni ṭhin a ni.
Tun season-ah pawh Transfer window khâr a la nih loh avangin Premier League Club ṭhenkhatin harsatna an la nei a, season ṭan tawh mahse Premier League Club ṭhenkhat chuan an elpui Club te hnenah an player ṭha te chân thei dinhmunah an la ding a, player langsar tak tak hmalam hun chiang lo kawl mek te tan player te chhawr danah harsatna an nei a ni. Chung zingah chuan Southampton’s Virgil van Dijk, Swansea’s Gylfi Sigurdsson leh Everton’s Ross Barkley te hmalam hun hi a la chiang lova, heng player te hi Premier League Club te vekin lakchhuahsak an la tum mek hlawm a ni.
Company pakhat Bwin-in a zirchiannaah chuan Season 5 liam taa transfer lian zual 10 zinga 7 te chuan League khelh ṭan tawh hnu-ah Premier League Club te a nghawng tih an sawi a, heng zingah hian Real Madrid lama Gareth Bale a kal te, Manchester United-in Angel di Maria leh Anthony Martial an lalut te, Kevin de Bruyne leh Nicolas Otamendi-ten Man-chester City an pan te leh Arsenal-in Mesut Ozil leh Shkodran Mustafi an lakluh te kha a tel a ni.
Premier League-a player lut 24% chu August ni 15 hnu lama thleng ṭhin niin an tarlang bawk.
Tuna rawtna awmah chuan Premier League Club te hian season ṭan a nih tawh chuan an Squad-ah player an belh thei tawh lovang a, amaherawhchu, European League-a Club dangte chuan anmahni rama Transfer window an khâr hma chuan England aṭangin player an lalut thei thung dawn a ni.