Nimin khan Serchhip District Screening Committee on PMAY (HFA) te chu an Chairman Pi Sangchhin Chinzah hovin a Office Chamber-ah an ṭhukhawm a, Serchhip District chhunga MLA pahnih Pi Vanlalawmpuii Chawngthu, Hrangturzo A/C leh Er. Lalrinawma, Tuikum A/C ten telpuiin kum 2017-18 chhunga Pradhan Mantra Awas Yojana-Housing For All hnuaia (Credit Link Subsidy Scheme) insakna diltu hrang hrangte dilna ûmzui dan tur ruahmanna an siam.
Chairman District Bawrhsap chuan sawrkar hmalakna te Bank kaltlanga thawh zel an nih tak avangin ram hmasawnna kawngah Bank ten mawhphurhna sang tak an neih thu sawiin, an kutah ram hmasawnna tam tak a innghat a ni, a ti a, Bank aiawh te ṭha taka an tel avangin lawmthu a sawi bawk.
Er. Lalrinawma, MLA chuan he scheme-in a tum ber chu mirethei, insakna nei zolo te in sak a nih angin a mamawhtu miretheite ring ngam chung a loan pek a ngai a, District chhunga bank hrang hrang ten chu chu hre reng chungin he scheme hi kalpui thei se a duh thu a sawi a. Pi Vanlalawmpuii Chawngthu, MLA pawhin a mamawhtu zawng zawngten he scheme hi an hman ṭangkai ngei theih nan thawh a ṭul thu sawiin, loan diltu mipuite pawhin loan a nihna hre reng chunga an dil a pawimawh a tih thu a tarlang a ni.
Nimina Meeting hian kum hmasa lama Housing For All kaltlanga Credit Link Subsidy kaltlanga insak ṭanpuina pek, Bank hrang hrangten an ûmzui dan thlirlet hona neih hmasak a ni a, 2016-17 chhunga kan District target neih 60 zingah mi 21 hnenah he Housing Loan hi pek fel tawh niin, District chhunga a pe ṭha ber chu MRB Serchhip Branch niin target 7 ah mi 7 a pe a, a dawtah Apex Bank niin target 20 a neihah mi 12 a pe a, SBI Serchhip chuan Target 20 ah mi 2 chauh a la pe hman thung a, a pe chhe ber chu MRB Chhiahtlang niin target a neih 6 chu pek a nei hman lova, amaherawh chu hengte hi tun 2017-18 ah pe vek turin an inruahman thung a ni.
Kumin 2017-18 ah hian Serchhip District ah Target 130 pek leh niin heng zinga 100 chu Serchhip Town atan a dah niin Thenzawl-ah 20 leh N.Vanlaiphaiah 10 pek a ni a, Serchhip bikah hian diltu mi 88 awmin, nikum lama dil, quota-in a daih loh avanga la pêk loh engemawzat te nen mi 100 tan hian ruahmanna siam zui niin, MRB Chhiahtlang chu 6, MRB New Serchhip 13, MRB Serchhip 28, SBI Serchhip 35, Mizoram Co-operative Apex Bank, Serchhip 20 leh UBI Serchhip 1 te ruahman sak an ni a, MRB N. Vanlaiphai chu 10 leh MRB Thenzawl leh SBI Thenzawl chu 10 ve ve target pek an ni bawk.
Heng target pekte hi an mahni Branch behchhana diltute chu buaipui tura ruahman niin loan diltute zinga pek tlak loh an awm a nih chuan nikum lama diltu la pek silohte atanga hnawhkhah dan ngaihtuah nise tia ruahmanna siam a ni.
Credit Link Subsidy Scheme hi mirethei an sum lakluh dan atanga teha group hrang hranga then te hnena insakna tur, zauhna turemaw zawm seina tur atana loan lak theihna ruahmanna a ni a, an loan lak interest ṭhenkhat chu Central sawrkar in a chhawk zangkhai sak (subsidy) a ni. A hrechiang duh tan UD&PA Department Directorate leh an District Office hrang hrangah te zawh chian theih a ni.